Sámediggi lea seastán dán jagi mealgadit mátkegoluin koronadili dihte. Mannan jagi ledje čanusjoavkodoaibmagolut, masa gullet mátkkošteapmi, orrun, čoahkkinbálkkát, dienasmassimat ja čoahkkingolut, 131 000 euro.

Dán jagi juovlamánu 26. beaivve rádjái ledje čanusjoavkodoaibmagolut čoggon 40 000 euro ovddas, mii lea sullii dušše goalmmádas mannan jagi ektui. Sámedikki bušeahtas goluide lei várrejuvvon dán jahkái 83 000 euro.

Sámedikki hálddahushoavda Pia Ruotsala-Kangasniemi mielde geavatkeahtes ruhta sirdášuvvá ruhtadoalloloahpaheamis, mii dohkkehuvvo geassemánus 2021, čuovvovaš jahkái. Dan geavaheamis mearriduvvo sierra geassemánu maŋŋel go sámedikkis oidnet loahpálaš bohtosa olles doaimma ektui.

– Mishan leat maiddái boahtán gáiddusbargamis badjelmearálaš golut liigebargorusttegiid oastimis, muitala Ruotsala-Kangasniemi.

Sámedikki čállingottis leat bargan njukčamánu rájes gáiddusin ja sámedikki čoahkkimat leat ordnejuvvon oassái gáiddusin.