Sápmi |

Sámediggi lea dohkkehan stáhta evttohusa ILO-konvenšuvnna ratifieremii

Sámedikki dievasčoahkkin lea gieđahallan otne dievasčoahkkimisttis stáhta evttohusa ILO-konvenšuvnna ratifiereneavttuid. Jienasteami maŋŋá evttohus dohkkehuvvui jienain 14 - 4. Sámediggi fertii miehtat nu gohčoduvvon čilgehussii, mainna ratifierenevttohusas čilgejuvvo, mo eananvuoigatvuođaid guoski artihkal 14 ollašuhttojuvvo Suomas.

Pentti Valle, Yrjö Musta ja Rauni Äärelä
Govva: Eljas Niskanen / Yle

Stáhta evttohus ILO-konvenšuvnna ratifieremii lea dohkkehuvvon otne Sámedikki dievasčoahkkimis. Ášši dohkkeheapmi manai jienastussii ja evttohusa guottiheaddjit vuite jienain 14 - 4.

Evttohusa dohkkeheami vuostálaste Anu Avaskari, Veikko Porsanger, Pentti Valle ja várreáirras Antti Sujala. Evttohusa guottihedje ságadoalli Klemetti Näkkäläjärvi, vuosttas várreságadoalli Tiina Sanila-Aikio, nubbi várreságadoalli Heikki Paltto, áirasat Tauno Haltta, Pertti Heikkuri, Jouko Hetta, Asko Länsman, Ulla Magga, Petra Magga- Vars, Anna Morottaja, Yrjö Musta, Arto Pohjanrinne, Ilmari Tapiola ja Rauni Äärelä.

Čoahkkimis váilo golbma áirasa. Avaskari ja Valle guđiiga sierraoaivila mearrádussii.

ILO-konvenšuvnna ratiferenevttohus manná dál skábmamánus riikkabeivviid gieđahallamii.

Sámediggi fertii miehtat addit čilgehusa das maid eananriekteartihkal Suomas dárkkuha

Sámediggi fertii miehtat nu gohčoduvvon čilgehussii, mainna ratifierenevttohusas čilgejuvvo, mo artihkal 14 ollašuhttojuvvo Suomas. Artihkal 14 gieđahallá eananvuoigatvuođaid.

Čilgehusa mielde Suoma ráđđehus ii ILO-soahpamuša dihte nuppástuhte sámi ruovttuguovllu stáhta, ovttaskas olbmuid, oktasašvuvddiid, gielddaid dahje eará almmolaš servošiid eatnamiid ja čáziid oamastan-, hálddašan- dahje geavahanrivttiid. Ná stáhta oamastan dahje hálddašan eatnamiid ja čáziid eai sirdde eret stáhta oamastusas dahje hálddašeamis.

– Stáhtaráđđi ja sámeáššiid ministtarbargojoavku gáibidedje dan čilgehusa, ahte maid máksá dat artihkkala 14 ollašuhttin Suomas. Mii eat sáhttán váldit dasa beali, ahte hálidatgo mii addit dan čilgehusa vai eat. Jus mii eat dan livčče addán ovttasráđiid, de dat evttohus ii livčče dolvojuvvon ratifiseremii, dat lei eaktun.

Näkkäläjärvi muitala, ahte su mielas dat ii lean mihkke buorre áššiid, dat ii lean sámedikki miela miel.

– Geahččaleimmet geažos áigge dan dadjat, ahte mii dan ratifiserema doarjut, muhto eat hálit mangelágan čilgehusa, go dat sulastahttá várrejumi, man fas ILO-soahpamuš iešalddes gieldá dehege dat lea dan vuoiŋŋa vuostá. Dás ii lean eará molsaeaktu.

ILO 169 -soahpamuša eananvuoigatvuođaid guoski artihkal 14 ja sámedikki dál dohkkehan čilgehus dan heiveheamis Suomas leat dán ođđasa mielddusin (eai oidno suomagiel veršuvnnas Uutisvahti-applikašuvnnas).

Oaivváldala ođđasa birra

Varrasamosat: Sápmi

Váldoođđasat

Varrasamosat

Muualla Yle.fi:ssä