Sápmi |

Sámediggi mearridii maŋidit sámediggeválggaid, njeallje áirasa guđđe sierraoaivila – dál ášši lea riikkabeivviid duohken

Badjelaš beannot diimmu ságastallama maŋŋá dievasčoahkkin jienastii stivrra evttohusa mielde.

Sámedikki dievasčoahkkin 18.6.2019
Sámedikki dievasčoahkkin 18.6.2019. Govva: Laura Pieski / Yle

Sámediggi gáibida stáhtaráđi addit láhkaevttohusa riikkabeivviide sámediggeválggaid maŋideamis.

Dievasčoahkkin mearridii áššis čoahkkimisttis maŋŋebárgga badjelaš beannot diimmu ságastallama maŋŋá.

Áššis addojuvvui okta vuosteevttohus, man mielde evttohusa válggaid maŋideamis galgá hilgut. Jienasteamis 13 áirasa jienastedje stivrra evttohusa mielde válggaid maŋideami beales ja njealjis evttohusa vuostá.

Válggaid maŋideami beales jienastedje ságadoalli Tiina Sanila-Aikio, vuosttas várreságadoalli Heikki Paltto, nubbi várreságadoalli Tuomas Aslak Juuso, stivralahtut Petra Magga-Vars ja Magreta Sara, lahtut Jouni Aikio, Veikko Feodoroff, Jouko Hetta, Aslak Holmberg, Kirsti Kustula, Ulla-Maarit Magga, Anne Nuorgam ja várrelahttu Asko Länsman.

Válggaid sirdima ákkastallet dainna, ahte Suoma stáhta gearggašii reageret ON olmmošriektekomitea čovdosiidda Alimus hálddahusrievtti mearrádusaid olis ovdal go válggat čađahuvvojit. Sámedikki ságadoalli Tiina Sanila-Aikio lea duđavaš mearrádussii.

– Lean duđavaš, ahte stuorra jietnaearuin Sámediggi mearridii addit riikkabeivviide evttohusa, man mielde sámediggeválggat sirdojuvvošedje jahkái 2021. Dál bajimus sámiid ovddasteaddji orgána lea addán dohkkeheami dasa, maid stivra lea ovddidan, dadjá Sanila-Aikio.

Anu Avaskari, Pigga Keskitalo, Kari Kyrö ja Pekka Pekkala guđđe mearrádusas sierraoaivila.

– Mun in dorjon evttohusa dan sivas, go das ii leat ságastallaman gevvon áiggil. Dathan buktojuvvui Sámedikki dievasčoahkkimii easka maŋŋelgihtii. Dasa lassin dát sáhttá dagahit dan, ahte oassi sápmelaččain vealahuvvo dán mearrádusa geažil, dadjá Keskitalo.

Ášši lea riikkabeivviid duohken

Válggaid sirdimis livčče gažaldat gearddelunddot doaibmabijus, man ulbmilin lea sihkkarastit sámediggelága rievdadusaid válmmaštallama, gieđahallama ja ollašuhttima ovdal čuovvovaš sámediggeválggaid. Evttohuvvon láhka livčče dárkkuhuvvon boahtit fápmui borgemánu vuosttas beaivve.

Vai válggaid gearggašedje maŋidit, galget riikkabeaivvit dohkkehit láhkanuppástusa ovdal riikkabeivviid geassebottu. Jus láhkaevttohus dohkkehuvvo, čavčča válgabarggut heaittihuvvojit.

– Dál dat lea riikkabeivviid duohken, dadjá Sanila-Aikio.

Čoahkkin mieđihii Sámedikki stivrii maiddái fápmudusa ráđđádallat ja soahpat Suoma stáhtain rievdadusa válmmaštallama gáibidan ovttaskasčuoggáin ja meannudanvugiin.

Varrasamosat: Sápmi

Váldoođđasat

Varrasamosat

Muualla Yle.fi:ssä