Kaikki talviolympialaisista!
Sápmi |

Sámediggi ohcá dieđiheaddji – Olbmot váillahit Sámedikki searvat sosiála mediai

Go Sámediggi ohcagođii dieđiheaddji, de olbmuide šadde vuordámušat ja gáibádusat das, ahte Suoma Sámediggi ferte goit sosiála mediai searvat.

Sámediggi ii leat sosiála medias, sis leat dušše neahttasiiddut.
Sámediggi ii leat sosiála medias, sis leat dušše neahttasiiddut. Govva: Sámedikki neahttasiidu / Screenshot

Sámediggi rabai gieskat mearreáigásaš dieđiheaddji barggu. Dál olbmot vurdet, ahte Sámediggi boahtá otná áigái ja searvá sosiála mediai, nu dahká goit Samuli Näkkälä Neakkelis.

– Mus alddán leat máŋggat sosiála mediakonttut maid beaivádan. Sosiála media lasiha rabasvuođa ja buktá áššiid lagabui olbmuid, danin Sámediggige galggašii leat otná beaivvis, čilge Näkkälä.

Nils-Samuli Näkkälä
Samuli Näkkälä sávvá sámedikki boahtit otná beavái ja searvat sosiálamediai. Govva: Minna Näkkäläjärvi / Yle

Dálá dilis dieđiheami dikšu lagamusat ságadoalli. Tiina Sanila-Aikio lea iežas namain sosiála medias Twitteras, muhto Suoma Sámediggi ii leat, ii gostige sosiála medias. Norgga ja Ruoŧa Sámedikkit guktot leaba ovdamearkka dihte Facebookkas.

Sámedikki ságadoalli Tiina Sanila-Aikio Twitter-siidu.
Sámedikki ságadoalli Tiina Sanila-Aikio Twitter-siidu. Govva: Yle

Ohcejohkalaš Márjá Sofe Aikio maid váillaha sámedikki sosiála mediai ja muittuha, ahte Facebook-siidduid beaivádeapmi ii leat nu váttis gal.

– Go Ohcejoga gielda searvvai Facebookkai, de dat orui hui vuogas. Gielda bidjá juoidá dieđáhusaid dohko. Sámediggi sáhtášii sosiála medias juogadit dieđáhusaid, bargosajiid ja liŋkkaid, ja ná juksat olbmuid.

– Dien várás gal ii dárbbaš sierra bargi, baicce sierra ossodaga olbmot sáhtášedje ieža beaivádit Facebook, dadjala Aikio.

“Stuorra áššiin galggašii bastit buorebut addit dieđu, nu sámiide go Suoma servodahkii”

Sámedikki ságadoalli Tiina Sanila-Aikio muitala, ahte Sámediggi lea nu stuorra ja máŋgga bealát organisašuvdna, ahte dieđiheaddjái lea dárbu. Dieđiheaddji sáhtášii juohkit dieđu das, makkár áššiin leat bargamin ja mii lea dáhpáhuvvamin.

– Go smiehttá makkár áššit leat dál jođus, dat leat stuorra áššit. Dain galggašii bastit buorebut addit dieđu nu sápmelaččaide go Suoma servodahkii, danin oainnán dárbbu iežamet dieđiheaddjái.

Márjá Sofe Aikio gáibidivčče Sámedikkis maiddái áššiid duogášdieđuid. Son maiddái arvaladdá, ahte leago stuorát dárbu dieđiheaddjái vai ovdamearkka dihte politihkalaš ráđđeaddái. Goabbá dal leaš prioritehta, de dan olbmos fertešedje leat buorit oktavuođat ja buorre dovdámuš sihke Suoma- ja sámeservodagas, gáibida Aikio.

– Ferte bastit fuolahit oktavuođain dohko riikkabeivviide ja bellodagaide. Galggašii diehtit, gosa ja mainna lágiin bastá váikkuhit eiseválddiide, dadjá Aikio.

Maria-Sofia Aikio Sámi Siida
Márjá-Sofe Aikio gáibida buriid oktavuođaid ja servvodatdovdámuša. Govva: NRK / Tamie Sue Runningen

Sámedikki diehtojuohkinplánas áigumuš searvat sosiála mediai

Sámediggi lea dahkan diehtojuohkinplána, mii lea dohkkehuvvon 19.6.2017 dollojuvvon dievasčoahkkimis. Doppe čuožžu maiddái áigumuš searvat sosiála mediai.

Plána mielde beaktilis dieđu juohkin dieđusge lasiha dieđuid sámiid birra, muhto addá maiddái sámiide vejolašvuođa váikkuhit mearrádusaid dahkamii.

Plána mielde viššalis dieđu juohkin galgá buktit Sámedikki lagabui olbmuid ja seammás bastit profileret Sámedikki sámiid oktasaš ovddasteaddjin. Plána mielde Sámediggái galggašii vuođđuduvvot sierra diehtojuohkinjoavku, mii plánešii dieđiheami.

Ohcanáigi Sámedikki dieđiheaddji bargui nohká 12.2.2018. Dáppe gávnnat almmuhusa barggus.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä