Sápmi |

Sámediggi válljii Heikki Paltto válgalávdegotti ságadoallin – Yle Sápmi čuovui

Yle Sápmi čuovui čoahkkima dán artihkkalis reálaáiggis. Sámedikki čoahkkin válljii láhkačálli virgái Kalle Varis ja dasa lassin 2023 válggaid várás válgalávdegotti.

Heikki Paltto
Boazodoalli ja fitnodatdoalli Hánno Heaika, Heikki Paltto válljejuvvui válgalávdegotti ságadoallin. Govva: Yle

Njealját dievasčoahkkin dán jahkái

Sámediggi lea čoahkkanan odne maŋŋebárgga ovcci áigge jagi njealját dievasčoahkkimii. Yle Sápmi čuovvu čoahkkima reálaáiggis dán artihkkalis.

Beavddi alde ii leat guhkes listu, baicce dán vuoro čoahkkimis nammadit virgái ođđa láhkačálli ja nannejit válgalávdegotti jagi 2023 válggaide.

Dasa lassin čoahkkimis čađahit ságajođiheaddjiid ja Sámedikki ovddastan lahtuid oppalašgeahčastagaid.

Guovttis ohcan láhkačálli virggi

Sámedikki láhkačálli virgi almmuhuvvui ohcanláhkái geassemánus. Virgái ozaiga guovttis, vuoigatvuođadiehtaga magisttar, várreduopmár Kalle Varis ja vuoigatvuođadiehtaga magisttar Sarita Kämäräinen. Varis lea guhká bargan láhkačálli virgesadjásažžan ja Kämäräinen fas bargá dál mearreáigasaš láhkačállin.

Sámedikki stivra evttoha Sámedikki čoahkkimii, ahte láhkačálli virgái nammaduvvo Kalle Varis 1.10.2021 rájes. Vuođuštussan lea, ahte Varis lea heivvoleamos láhkačálli virgebargguide gullevaš bargohárjánumi ja -dovdámuša vuođul.

Válgalávdegotti nannen

Sámedikki stivra evttoha Sámedikki dievasčoahkkimii, ahte dat ásahivčče Sámedikki jagi 2023 válggaide válgalávdegotti. Válgalávdegottis galget leat ságadoalli, njeallje eará lahtu ja buohkaide persovnnalaš várrelahtu.

Válgalávdegottis galgá leat lahttu ja várrelahttu juohke gielddas sámiid ruovttuguovllus. Lahtuid nammadettiin galgá čuovvut dásseárvolága.

Čoahkkima sáhttá čuovvut njuolggosáddagis Sámedikki neahttasiiddus.

Beaivvi ságaid ja Yle Ođđasiid Sámis sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä