Sápmi |

Sámediggi vuođđuda guhtta ođđa virggi – lasi resurssat oahppomateriálaide ja mánáid- ja kulturdoaimmaide

Sámediggi mearridii ođđa virggiid vuođđudeami lassin earret eará válljet ovddasteaddji ehtalaš rávvagiid bearráigeahččoorgánii.

Govva Sámedikki plánejuvvon dievasčoahkkimis 4.10.2019 sámekulturguovddáš Sajosa parlameantasáles.
Govva Sámedikki plánejuvvon dievasčoahkkimis 4.10.2019 sámekulturguovddáš Sajosa parlameantasáles. Govva: Kirsti Länsman / Yle

Sámedikki dievasčoahkkin gieđahalai maŋŋebárgga dievasčoahkkimisttis ođđa virggiid vuođđudeami ja mearridii vuođđudit olles guhtta ođđa virggi.

Sámedikki skuvlen- ja oahppomateriáladoaimmahahkii mearridedje vuođđudit anáraš- ja nuortalašgielat oahppomateriálaplánejeaddjiid virggiid, ja maiddái plánemis vástideaddji oahppomateriálaplánejeaddji virggi.

Dasa lassin Sámediggi vuođđuda sihke mánáidkulturguovddáža doaimmajođiheaddji, musihkkaguovddáža plánejeaddji ja eamiálbmogiid filbmaguovddáža plánejeaddji virggiid.

Virggiid vuođđudeami álget dál válmmaštallat.

Válljejedje ovddasteaddji ehtalaš rávvagiid bearráigeahččoorgánii

Sámediggi mearridii maŋŋebárgga dievasčoahkkimisttis maiddái nammadit Aslak Holmberg Sámedikki ehtalaš rávvagiid bearráigeahččoorgánii. Stivra lea ovdalis nammadan dasa iežas ovddasteaddjin Tuomas Aslak Juuso.

Sámediggái dahkkojuvvojedje ehtalaš rávvagat dan maŋŋá, go Sámedikki bargit dovde, ahte sin birra hállojuvvui eahpeáššálaččat Sámedikki dievasčoahkkimis guovvamánus. Bargit čálle áššis cealkámuša ja dat gieđahallojuvvui njukčamánus bargiidčoahkkimis ja cuoŋománus Sámedikki stivrras. Stivra sirddii ášši joatkkaválmmaštallamii geassemánu dievasčoahkkimii, mas Sámediggi dohkkehii ehtalaš rávvagiid atnui.

Sámediggi dohkkehii maŋŋebárgga maiddái Akwé: Kon -rávvagiid heiveheami guoskevaš doaibmamálle dihto eavttuiguin. Akwé: Kon -ášši ságastahtii čoahkkimis eanemus ja dan olis dahkege olu evttohusaid ja dolle maid ráđđádallanbottu. Loga dáppe lasi Akwé: Kon -rávvagiin.

Maŋŋebárgga čoahkkin lei dán jagi goalmmát dievasčoahkkin. Čoahkkin galggai leat juo golggotmánu álggus, muhto čoahkkimii eai boahtán doarvái lahtut ja danin das ii lean mearridanváldi.

Jagi ja seammás dálá Sámedikki maŋimuš dievasčoahkkin dollojuvvo 17.–18.12.2019.

Divvojuvvon 1.11. dii 13.11 diehtu Akwe: Kon -rávvagiin.

Varrasamosat: Sápmi

Váldoođđasat

Varrasamosat

Muualla Yle.fi:ssä