Sápmi |

Sámedikki áirras navdá leat váttis oažžut sámediggelága mearrideddjiid beavdái go Sámediggi ieš hilggui láhkaevttohusa

Sámediggeláhkahápmosa hilguma maŋŋá sámepolitihkkáriin bohciidan fuolla, mo ovddidit sámeáššiid mearrideaddjiid guvlui.

Anu Avaskari
Anu Avaskari mielas galggašii vuordit dasságo ođđa riikkabeaivvit ja mearrideaddji leat válljejuvvon ja dasto ovddidišgoahtit sámeáššiid. Govva: Linda Tammela / Yle

Sámedikki dievasčoahkkin mearridii vuossárgga hilgut sámediggeláhkahápmosa čavga jienasteami maŋŋá. Sámedikki stivra ja oassi Sámedikki áirasiin bukte ovdan čoahkkimis, ahte go sin mielas dálá láhkahámus ii lean dohkálaš, de áššiin galggašii bargat áŋgirit viidásabbot.

Sámedikki nubbi ságadoalli Tuomas Aslak Juuso buvttii ovdan duorastaga Yle Sámi jearahallamis, ahte sámediggelága ođasmahttin lea okta Sámedikki dehálamos ulbmiliin Suoma čuovvovaš ráđđehusa prográmmii.

Sámedikki stivra lea borgemánu loahpas geavvan iežas sáttaságastallama Sámedikki ulbmiliin ja das, mo válmmaštallat ášši mearrideddjiid ja Suoma bellodagaid guvlui. Stivra lea áigon vuođđudit bargojoavkku, mas válmmaštallá ášši ja hukse vuođđodoaibmabijuid maiguin ovdánit.

Dán mandáhta ja Sámedikki stivrra ulbmiliid eai buohkat dohkket vaikko vel guottihitge jurdaga oažžut sámeáššiid mearrideddjiid áššelistui. Anárlaš Kari Kyrö, Anu Avaskari ja eanodatlaš Pigga Keskitalo celket mediadieđáhusasteaset, ahte oaidnu ii ovddas buot Sámedikki áirasiid oainnu.

Ášši lei gal ovdan oktan paragráfan Sámedikki dievasčoahkkimis vuossárgga, muhto dán sáttaságastallama sisdoalu Avaskari, Kyrö ja Keskitalo ane vel leat doarvái vai Sámediggi sáhtašii ovddidit ášši.

– Galhan sámeáššiid livčče buorre oažžut ráđđehusprográmmii ollisvuohtan ja geahččat mii lea dehálaš ja áigeguovdil guđege áiggis. Dál mu ipmárdusa mielde sáttaságastallamis eai dakkárat badjánan čielgasit ovdan, dadjá Avaskari.

– Sámedikki dievasčoahkkin galgá leat dan dohkkehan ja das geavvan sáttaságastallama. Oainnášin, jos Sámedikkis hállojuvvo servodatráfis, de joatkaga dáfus livčče dehálaš, ahte vealaheapmi nogašii ja guovlolaš demokratiija lassánivčče.

Háliidivčče vuordit giđđii ovdalgo ovddidišgoađašii sámeáššiid

Sámediggelága oažžun ođđasit politihkkáriid áššelistui lea buncarákkis, man sámepolitihkkárat dál vihkkehallet. Dalán Sámedikki dievasčoahkkima maŋŋá Pentti Pieski dajai, ahte jienastusbohtosiinnis Sámediggi heajudii sámiid ja Suoma stáhta gaskasaš ovttasbarggu. Maiddái Anu Avaskari jáhkká, ahte Sámedikkis soaitá leat váttis joatkit sámediggeláhkaságastallama mearrideddjiiguin ja riikkapolitihkkáriin go Sámediggi ieš gomihii sámediggeláhkahápmosa.

– Dál go niege buorre láhkaevttohus hilgojuvvui, de in gal dieđe mo dan galggašii vuovdalit. Sámedikki iežas ráđđádallit ja stivra livčče galgan bissut evttohusa duohki. Moson stáhta ja bellodagat ožžot dása čielgasa go Sámediggi gieđahalai ášši dákkár moivedilis, imaštallá Avaskari.

Avaskari oaidná, ahte dán muttus Sámediggi galggašii máššat vuorddestit ja geahččat dasságo čuovvovaš ráđđehus ja mearrideaddjit leat válljejuvvon.

– Ođđa luohttámušolbmuin vuolggášii daid birra ráđđádallat, geat doppe dasto leatge mearrideamen. Dálá riikkabeivviid bellodagat soitet váldit áššiid bellodatprográmmaide, muhto gal dat ođđa luohttámušolbmot doppe loahpa loahpas mearridit daid politihkalaš prográmmain, loahpaha Avaskari.

28.9.2018 dii. 18.32. Ođas divvojuvvon. Viđát kapihttalii lasihuvvon diehtu, ahte Kyrö, Avaskari ja Keskitalo celket áššis mediadieđáhusas.

Varrasamosat: Sápmi

Váldoođđasat

Varrasamosat

Muualla Yle.fi:ssä