Sápmi |

Sámedikki bušehttii 130 000 euro lasáhus – Ruhta geavahuvvo čoahkkingoluide

Dan lassin Sámediggi geahččala oažžut 410 000 euro lasi jahkái 2019. Dainna ruđain Sámediggi rabašii earet eará dieđiheaddji virggi.

Pia Ruotsala
Govva: Susanna Guttorm / Yle

Mannan vahkus almmustahttui Suoma ráđđehusa riikkabeivviide dahkkon evttohus stáhta boahtte jagi bušeahttaárvalussan. Bušeahttaárvalusas lei maiddái 130 000 euro lasáhus Suoma Sámedikki bušehttii. Olles Sámedikki doaimma boađut lea ain badjel 6 ja bealle miljon euro.

Sámedikki hálddahushoavda Pia Ruotsala-Kangasniemi lea ilus dan lasáhusas, danin go das lea stuorra mearkkašupmi Sámediggái.

– Das lea duohta stuora mearkkašupmi, min doaibmaorgánat leat minimabušeahtain čoahkkimastán, ahte jus lávdegottiin lea leamašan 4000 euro čoahkkinbušeahtta de leat oalle unni, ja dál mii sáhtti goasii duppalastit dan, illuda Ruotsala-Kangasniemi.

Dat ruđat bohtetge váikkuhit njuolga čoahkkimiid bušehttii.

– Stivra evttoha, ahte dat ruđat mannet čoahkkimastimii, parlamentaralaš doaimmaide, ja min doaibmaorgánaide, sihke oktasaš bargoorgánaid čoahkkinbušeahtaide, ahte dieid sáhtaleimme bajidit.

– Dieđusge čanusjoavkkuid ovddideapmái lea dat maiddái jurddašuvvon, lasiha hálddahushoavda. 

Geahččalit fidnet 410 000 euro lasáhusa jahkái 2019 – Áiggošedje ráhpat ođđa virggiid

Ruhtaváljagotti smiehttamušas stáhta bušeahttaárvalusas čuožžu sierraoaivilin (vastalauseissa) evttohus, ahte riekteministeriija doarjagiin lasihuvvo 410 000 euro Sámedikki doarjagii.

Dat lasáhus goittotge ii lihkostuva vel boahtte jahkái. Sámedikki hálddahushoavda goittotge jáhkká, ahte dat ollašuvvá jahkái 2019.

– Evttohus ii lihkostuvvan, nu leat dasto guođđán sierraoaiviliid. Dál mii bargat dan ovdii, ahte dat ollašuvalii jagis 2019, lohká Pia Ruotsala-Kangasniemi.

Jus Sámediggi fidne 410 000 euro lasáhusa, sii áigot rahpat ođđa virggiid dainna ruđain.

–  Dieinna sáhtalii bálkkáhit ovdamearka dihte ealáhusčálli, riikkaidgaskasaš čálli ja dieđiheaddji, muitala Ruotsala-Kangasniemi.

Otne vuossárgga lea Sámedikki dievasčoahkkin, man áššelisttus lea earet eará jagi 2018 bušeahttaárvalus. Čoahkkima sáhttá čuovvut streama bokte.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä