Sápmi |

Sámedikki čoahkkinstreamii viimmat dulkon – "Lea dehálaš, ahte juohkehaš bastá hállat sámegiela Sámedikki čoahkkimis"

Sámedikki čoahkkinstreamii sáhttá válljet dulkoma golmma sámegillii ja suomagillii.

Tiina Sanila-Aikio
Tiina Sanila-Aikio sávvá, ahte sámediggeáirasat sámástisgohtet fas čoahkkamiin. Govva: Vesa Toppari / Yle

Sámediggi lea juo guhká bargan dan ovdii, ahte čoahkkinstreama geahčči sáhttá válljet, man gillii háliida dulkoma. Dál viimmat Sámediggi bastá fállat dan vejolašvuođa streama gehččiide.

Neahttastreamas sáhttá válljet dulkoma anáraš-, davvisáme,- dahje nuortalašgillii ja maiddái suomagillii. Streama sáhttá guldalit maid dulkoma haga. Dulkon gullo juo maŋŋebárgga ja gaskavahku dievasčoahkkimis.

Stuorimus váttisvuohta leamaš čoavdit teknihkalaš váttisvuođaid, muitala Sámedikki ságajođiheaddji Tiina Sanila-Aikio.

– Teknihkalaš čovdosiid ohcan lea leamašan dehálamos dán áššis, go mis leat goittotge njeallje giela ja vel dat sále jietna. Dat lea váldán olu áiggi. Dál de lihkus leat ožžon daid dulkongielaid maiddái fárrui, ahte juohkehaš bastá ieš válljet, illuda Sanila-Aikio.

Muhtimat sámediggeáirasiin leat válljen suomastit čoahkkimiin, vai maiddái streama geahččit áddejit mas lea sáhka. Tiina Sanila-Aikio sávvá, ahte dulkoma geažil áirasat sáhttet geavahit sámegielaid čoahkkingiellan.

– Lea dehálaš, ahte oažžut gieđahallat áššiid nu, ahte juohkehaš sáhttá hállat sámegiela čoahkkimis, jus dan háliida geavahit. Go dulkon manná suomagillii dahje eará sámegielaide, ii dárbbaš molsut gielaid gaskan čoahkkima. Dehálamos bealli das lea dat, ahte oažžut dan dieđu olggos, mii hállojuvvo Sámedikki čoahkkimis.

Tiina Sanila-Aikio
Sanila-Aikio lea ilus dulkon vejolašvuođas. Govva: Vesa Toppari / Yle

Sanila-Aikio mielde streama giellaválljejumit leat ságastahttán olbmuid ja leat soaitán šaddat juobe boasttoáddejumit das, ahte maid giige lea čoahkkimis dadjan.

– Muittán áibbas iežan ságadoallibaji álggus, ahte šattai garra ságastallan das, ahte mo dál go mun hálan ja geavahan nuortalašgiela Sámedikki čoahkkimiin.

– Dieđusge dál olbmot leat hárjánan guldalit nuortalašgiela eanet ah' eanet, de sávan maiddái, ahte áddejupmi sámegielaid gaskal lea sturron. Dieđusge gielaid gaskal leat oalle stuorrage erohusat, de dat boasttoáddejupmi soaitá šaddat das, čilge Tiina Sanila-Aikio.

"Dál sáhtášin iešge vilppastit čoahkkinstreama"

Bárttetlaš Sáárákáisá Seurujärvi mielas lea buorre, go dulkon viimmat lihkostuvvá maiddái neahttastreamas. Son ii leat ovdal čuvvon Sámedikki čoahkkimiid streama bokte, muhto dál gal sáhtášii, go dan sáhttá čuovvut iežas eatnigillii, anárašgillii.

– Galhan mun sáhtášin goittot iskat geahččat daid čoahkkimiid dál, boagusta Seurujärvi.

Sáárákáisá Seurujärvi
Sáárákáisá Seurujärvi ii leat geahččan Sámedikki čoahkkinstreamaid, muhto dál gal sáhtašii vilppastit, go oažžu guldalit sáhkavuoruid iežas eatnigillii. Govva: Vesa Toppari / Yle

Sáárákáisá Seurujärvi mielde dulkonvejolašvuohta lea erenomáš buorre danin, go anárašgiela ii muđuige gula nu olu. Son árvala iežas oažžut olu buorebut áššiin gitta, go sáhttá guldalit čoahkkima anárašgillii.

– Mu mielas dat lea buorre ášši, jus olbmot eai vaikko ádde davvisámegiela, de sii sáhttet geahččat dan anárašgillii ja dalle áddejitge olu eambo ja ožžot buorebut gitta dain áššiin, main lea sáhka.

Sámedikki guovttebeaivásaš dievasčoahkkin álgá maŋŋebárgga diibmu 10. Streama dulkonmolssaeavttuiguin gávdno dáppe.

Varrasamosat: Sápmi

Váldoođđasat

Varrasamosat

Muualla Yle.fi:ssä