Sápmi |

Sámedikki dievasčoahkkima ii sáhttán doallat – čoahkkimii bohte dušše 10 áirasa

Ođđa čoahkkin ordnejuvvo nu jođánit go vejolaš, muitala ságadoalli Tiina Sanila-Aikio.

Govva Sámedikki plánejuvvon dievasčoahkkimis 4.10.2019 sámekulturguovddáš Sajosa parlameantasáles.
Govva Sámedikki plánejuvvon dievasčoahkkimis 4.10.2019 sámekulturguovddáš Sajosa parlameantasáles. Govva: Kirsti Länsman / Yle

Sámedikki dán jagi goalmmát dievasčoahkkima eai sáhttán doallat otne bearjadaga 4.10.2019.

Čoahkkimii bohte dušše logi lahtu, man dihte čoahkkimis ii lean lága mielde mearridanváldi. Sámediggelága mielde dievasčoahkkimis lea mearridanváldi, go dasa oassálastet ságadoalli dahje juobba goabbá várreságadoalliin ja unnimustá bealli eará lahtuin. Sámedikkis leat 21 lahtu. Čoahkkimis váillui nappo okta áirras.

Sámedikki ságadoalli Tiina Sanila-Aikio ii árval siva dasa, manin čoahkkimii eai lean dán vuoro doarvái boahttit. Čoahkkin goit deaivvai justa válggaid maŋŋá.

– Plániimet dán jahkái njeallje čoahkkima ja dát deaivvai dál válggaid maŋŋá, Sanila-Aikio muitala.

Sámediggi livčče galgan goalmmát čoahkkimisttis mearridit earret eará ođđa virggiid vuođđudeamis ja nammadit lahtuid ehtalaš rávvagiid bearráigeahččoorgánii. Goalmmát čoahkkimii plánejuvvon áššiid gieđahallama váras ordnejuvvo ođđa čoahkkin.

– Mii bovdet čoahkkái nu jođánit go vejolaš ođđa čoahkkima, Tiina Sanila-Aikio joatká.

Dálá Sámedikki dán jagi njealját ja seammás olles válgaáigodaga 2016–2019 maŋimuš dievasčoahkkin dollojuvvo juovlamánus.

Varrasamosat: Sápmi

Váldoođđasat

Varrasamosat

Muualla Yle.fi:ssä