Sápmi |

Sámedikki kulturlávdegoddi juolludii juovlaskeaŋkaruđaid kultuvrra ja giela ovddideapmái: "Somá, ahte lea juobe vehá eanet ruhta”

Sámedikki kulturlávdegoddi lea juohkán riikkabeaivviid juovlaskeaŋkaruđain 45 000 euro sámegielat kultuvrra ovddideapmái.

Saamelaiskäräjien jäsen ja kulttuurilautakunnan puheenjohtaja Pirita Näkkäläjärvi
Sámedikki kulturlávdegotti ságadoalli Pirita Näkkäläjärvi muitala, ahte sii iske juolludit ruđaid nu viidát go vejolaš. Govva: Ville-Riiko Fofonoff / Sámediggi | Saamelaiskäräjät

Sámedikki kulturlávdegoddi lea juolludan 45 000 euro ovddas kulturdoarjagiid sámedáidaga ja -kultuvrra ovddideapmái.

Gažaldat lea nu gohčoduvvon juovlaskeaŋkaruđain, maid riikkabeaivvit lasihedje stáhta jagi 2020 bušeahttaárvalussii.

Kulturlávdegoddi dagai juolludemiid golggotmánu 2019 ohcamušaid vuođul, dasgo juovlaskeaŋkaruđa galgá geavahit jagi 2020 áigge. Ođđa ohcama ii lean áigi ordnet.

Sámedikki kulturlávdegotti ságadoalli Pirita Näkkäläjärvi muitala, ahte sii iske juolludit ruđaid nu viidát go vejolaš.

– Nu, ahte iešguđet guovllut ja sámegielat, ja iešguđetlágán doaimmat ja suorggit oaččošedje ruđa. Doppe leat joavkkus dakkár juolludeamit dál, mat leat lasseruhtadeapmi dasa, mii addojuvvui juovlamánus, muitala Näkkäläjärvi.

“Somá, ahte lea juobe vehá eanet ruhta”

Sámedikki kulturlávdegotti kulturmearreruhta lea sullii 178 000 euro jagis. Das lávdegoddi ferte juohkit oasáža ovdamearkka dihte servviide, dáiddáriidda, kulturprošeavttaide ja maiddái doarjut Ohcejoga girkostobuid.

Sámedikki kulturlávdegotti ulbmilin lea dán válgabajis 2020–2023 loktet kulturmearreruđa 250 000 euroi, mas 13 000 euro manašii Ohcejoga girkostobuide. Kulturlávdegotti ságadoalli Pirita Näkkäläjärvi lea čállán fáttás maid bloggačállosa, mas son muitala, ahte maŋimuš ohcamis kulturlávdegoddi fidnii ohcamušaid oktiibuot 399 770 euro ovddas. Nuba doarjaga bastet addit olu unnit, go livččii dárbu.

Go ruhta ii leat beare olu, muhto doaibmit, geat dárbbašit doarjaga leat olu, báhcá gaskamearalaš doarjjasupmi uhccin. Näkkäläjärvi oaivvilda, ahte juovlaskeaŋkaruhta buorida dili goittotge vehá.

– Smihtten, ahte man somá, ahte lea juobe vehá eanet ruhta, ahte sáhtášii addit vehá eanet doarjaga min dáiddáriidda, geat galggašedje goittotge bastit ámmátlaččat bargat dáiddabarggu, muitala Näkkäläjärvi dál juolluduvvon doarjagiin.

Doarjagiid oažžut – mielde earret eará girjjit, čájáhusat ja podcast

AITOSAŠ KULTURDOARJJA

  • Johtti Sápmelaččat: Prošeaktadoarjja, luohti-cd ráhkadeapmái 500 €

EARÁ KULTURDOARJJA

  • Roavvenjárgga Sámi searvi rs Mii: Kultur- ja dáiddadáhpáhusaide 2 000 €
  • Sámi Duodji: Sisteráhkadankursa 1 000 €
  • Sis-Suoma Sámesearvi, Bárbmu rs: Kursadoaimmaide 1 500 €, bearašdoaimmaide 1 000 €
  • Sámi Árvvut ry: Sámiid kulturbirasbáikkit, máidnasat, myhtat ja geavaheapmi -girjji materiála čohkken 5 000 €
  • Suoma Sámi Nuorat: Sámi guollebivdu ja guolástanvuoigatvuohta -kurssa várás 2 000 €

SERVVIID DOAIBMADOARJAGAT

  • Anarâškielâ servi rs 1 000 €
  • Roavvenjárgga Sámi searvi rs Mii. 500 €
  • Sámi Bálgosat 500 €
  • Sis-Suoma Sámesearvi, Bárbmu rs 500 €
  • Suoma Sámi nuorat 2 000 €
  • Vuohču Sámiid searvi rs 500 €
  • Sámiráđi Suoma Juogus 2 000 €
  • Sámi Siida rs 3 000 €
  • Oulu Sámit rs 3 000 €

ALMMUSTAHTTINDOARJJA

  • Anarâškielâ servi rs: Anarâš-bláđi almmustahttimii 1 500 €
  • Aikio Inger-Mari: Prošeaktadoarjja, Buolbmatjávrri historjágirjji almmustahttimii 1 500 €

DOARJAGAT PRIVÁHTA OLBMUIDE

Govvadáidda

  • Ranttila Merja Aletta: Bargoveahkkeruhta, dáiddalaš bargamii 2 000 €

Girjjálašvuohta

  • Laiti-Hedemäki Elsa: Bargoveahkkeruhta, davvisámegielat diktagirjji ráhkadeapmái 1 000 €
  • Magga Hannu: Boazomearkagirjji várás 2 000 €

Musihkka

  • Aikio Ante: Prošeaktadoarjja, sámegielat cd buvttadeapmái ja almmustahttimii 1 000 €
  • Aikio Aimo Antero: Prošeaktadoarjja, Anarist Čevetjáávrán, musihkka streamenbálvalussii 500 €
  • Magga-Vars Petra Biret: Bargoveahkkeruhta, luohti-cd ráhkadeapmái 1 000 €
  • Lumikivi Anna: Prošeaktadoarjja, Suommkar-joavkku nuppi báddemii Peäccam da Paččjokk 1 000 €
  • Ulla Pirttijärvi-Länsman: Prošeaktadoarjja, Ulla Pirttijärvi ja Uldda goalmmát álbuma “Vuolgigoahtit” 500 €
  • Saari Frans Vilhelmi: Bargoveahkkeruhta, sámemusihka ráhkadeapmái 2 000 €

Ealligovva ja multimedia

  • Arrela Taru: Prošeaktadoarjja, Ruoktu - johka dokumeantafilmma várás 2 000 €

Teáhter

  • Aikio Niilo Einari M.: Prošeaktadoarjja, Niga 8 jagiáiggi -dohkkáteáhtera heiveheapmái anáraš-, nuortalaš- ja davvisámegillii 2 000 €
  • Gaup-Juuso Ingá-Máret: čuovgagovvabuvttadeami prenten čájáhussii sihke elektrovnnalaš ja multimedia hápmái 3 000 €

Eará kulturdoarjja

  • Neeta Jääskö ja Niina Aikio-Siltala: Anárašgielat podcast buvttadeapmái 2 000 €
  • Magga Aila Kristiina: Eanodaga Gálggojávrri boazosámiid historjjá vurkemii 1 000 €

Beaiváduvvon 28.5. dii. 16.12: Vuosttaš sitáhtta dievasmahttojuvvon.

Varrasamosat: Sápmi

Váldoođđasat

Varrasamosat

Muualla Yle.fi:ssä