Sápmi |

Sámedikki nubbi várreságadoalli: “Mii leat dieđusge behtton dieinna, ahte AHR-mearrádus boahtá dán hámis”

Sámediggi ferte dál geahččat dárkilit analyseret maid dát mearrádus sisttisdoallá, muitala Juuso.

Tuomas-Aslak Juuso
Govva: Vesa Toppari / Yle

Otne bearjadaga Sámedikki nubbi várreságadoalli Tuomas Aslak Juuso dovdá stuorra beahttašumi. Guovdu bargomátkki Fránskkas, son oažžu dieđu, man ii váldde iluin vuostá.

Alimus hálddahusriekti lea hilgon burginohcamušaid, maid Sámediggi lei dahkan.

– Mii leat dieđusge behtton dieinna, ahte diekkár mearrádus boahtá dán hámis. Ferten imaštallat mo dat lea šaddan nie, muitala Juuso.

– Mis lea vuordámuš dasa, ahte Suoma stáhta duohtandahka SP-soahpamuša (siviila- ja politihkalaš vuoigatvuođaid riikkaidgaskasaš soahpamuša) ja gudnejahttá Ovttastuvvan Našuvnnaid olmmošvuoigatvuohtakomitea mearrádusaid dán ášši olis, dadjá Juuso.

Juuso mielas vuordámuš lei, ahte Suopma gudnejahttá dan soahpamuša, masa ieš lea čatnasan.

– Dieđusge go olmmošvuoigatvuohtakomitea lea dahkan mearrádusa áššis, mii guoská SP-soahpamuša duohtandahkama. Dalle dieđusge lea hui lunddolaš vuordit, ahte soahpamuš, masa Suopma ieš lea čatnasan, dat gudnejahttojuvvo ja duohtandahkkojuvvo, dadjá Juuso.

Sámediggi ferte vuodjut dárkilabbot mearrádussii

Juuso ii leat geargan vuodjut AHR-mearrádussii, mii almmustuvai bearjadaga iđđes. Son lea geargan oktii dušše logastit mearrádusa čađa.

– Mii fertet lohkat buorebut ja dárkilabbot mearrádusa. Fertet geahččat ja analyseret maid dát mearrádus sisttisdoallá.

Čoahkkanago Sámediggi dán ášši olis?

– Dat lea ášši man ferte árvvoštallat čavčča bealde, muhto dál ovttat máno eat boađe čoahkkanit.

Sámediggi dieđiha áššis lasi maŋŋelaš.

Vaikko Ovttastuvvan Našuvnnaid olmmošriektekomitea moittii Suoma, de AHR ii burgge mearrádusaidis

Alimus hálddahusriekti hilggui bearjadaga Sámedikki stivrra dahkan burginohcamušaid. Sámedikki stivra mearridii dahkat burginohcamuša alimus hálddahusrievtti mearrádusaide, mat guske jagiid 2011 ja 2015 sámediggeválggaid válgalogahallama.

Sámediggi lei ákkastallan burginohcamušaid Ovttastuvvan Našuvnnaid olmmošriektekomitea guovtti mearrádusain. Dain olmmošriektekomitea moittii Suoma stáhta sápmelaččaid rivttiid loavkašuhttimis, go AHR dohkkehii Sámedikki válgalogahallamii olbmuid, vuostá Sámedikki dáhtu.

Alimus hálddahusriekti dieđáhusa mielde sii eai leat vázzán sámediggelága badjel, iige alimus hálddahusriekti leat dulkon njuolggadusa boastut.
Burgima sáhttá ohcat, jus ohcci navdá, ahte áššis lea meannudanfeaila dahje áššis lea ilbman ođđa dieđut. AHR mielas Ovttastuvvan Našuvnnaid oaiviliid eai sáhttán doallat ođđa čielggadeapmin, dárkkálmahttá AHR.

Sámediggi lei maid gáibidan maŋidit sámediggeválggaid. Válggaid sirdima ákkastallet dainna, ahte Suoma stáhta gearggašii reageret ON olmmošriektekomitea čovdosiidda Alimus hálddahusrievtti mearrádusaid olis ovdal go válggat čađahuvvojit.

Riekteministeriija goit dieđihii gieskat, ahte čavčča sámediggeválggaid ii leat šat vejolaš sirdit.

Varrasamosat: Sápmi

Váldoođđasat

Varrasamosat

Muualla Yle.fi:ssä