Sápmi |

Sámedikki Nuoraidráđđi ohcá ođđa lahtuid – áššedovdilahttu: "Sáhtát váikkuhit sámenuoraid áššiide ja oahpásmuvvat ođđa olbmuide"

Nuoraidráđi čuovvovaš badji álgá ođđajagimánus.

Nuoraidráđđi, Nuorisoneuvosto, Saamelaiskäräjät, Sámediggi, Sunna Siilasjoki
Sunna Siilasjoki, Gárasavvonis eret, lea doaibman ovtta baji Nuoraidráđi áššedovdilahttun. Son lea duđavaš dasa, ahte beasai doibmii mielde. Govva: Marko Junttila / Sámedikki Nuoraidráđđi

Sámedikki Nuoraidráđđi ohcá čuovvovaš badjái ođđa aktiivvalaš nuoraid mielde.

Nuoraidráđi lahttun sáhttá ohcat ieš, muhto maiddái evttohit eará olbmuid fárrui doibmii. Ođđa doaibmabadji álgá jagi 2020 álggus ja dat bistá jagi 2021 lohppii.

Ođđa lahtuid válljemis váldojuvvo vuhtii dat, ahte nuorat leat iešguđet giellajoavkkuin ja guovlluin eret, ja ahte sohkabealit leat dásseárvvus.

Nuoraidráđđái válljejuvvojit guovtti jagi badjái ságadoalli, várreságadoalli ja vihtta lahtu sihke juohkehažžii persovnnalaš várrelahtut. Lahtut galget leat 18–28-jahkásaččat dalle, go sii válljejuvvojit.

Nuoraidráđđái válljejuvvojit eanemustá vihtta 15–17-jahkásaš áššedovdilahtu.

“Oba miellagiddevaš”

Gárasavvonlaš Sunna Siilasjoki lea Nuoraidráđi áššedovdilahttu. Son lea dál vuosttaš baji mielde Nuoraidráđi doaimmain.

Dego máŋgasiin, maid Siilasjokis lei dáhttu bargat sámenuoraid áššiid ovdii. Danin son ozai fárrui doibmii ja beasai álggahit áššedovdilahttun.

– Lean liikon leat Nuoraidráđis mielde. Mis leat álo ođđa prošeavttat ja lea somá leat mielde ovddideamen sámenuoraid áššiid, Siilasjoki čilge Sohkaršohka jearahallamis.

Eará sámenuoraid deaivvadeapmi lea mearkkašahtti oassi Nuoraidráđi doaimmas. Go Siilasjoki smiehttá, manne gánneha ohcat Nuoraidráđđái, lea vástádus gal čielggas.

– Danne, go don sáhtát váikkuhit sámenuoraid áššiide, oahpásmuvvat ođđa olbmuide, beassat mielde iešguđetlágan dáhpáhusaide ja oassálastit prošeavttaide. Dat lea oba miellagiddevaš, lohká Siilasjoki.

Máŋggalágan doaimmat ja prošeavttat

Nuoraidráđi bargun leat iešguđetlágán prošeavttat ja doaimmat, maid ulbmilin lea ovddidit sámenuoraid gielalaš ja kultuvrralaš vuoigatvuođaid. Doaimma guovddážis lea sámenuoraid identitehta nannen.

Sámedikki Nuoraidráđi ságadoalli Risten Mustonen, várreságadoalli Ánte Veijola ja várrelahttu Marianne Ketola.
Sámedikki Nuoraidráđi ságadoalli Risten Mustonen, várreságadoalli Ánte Veijola ja várrelahttu Marianne Ketola. Govva: Sámedikki Nuoraidráđđi

Nuoraidráđđi válmmaštallá Sámediggái evttohusaid ja cealkámušaid, mat gusket sámenuoraid. Sámedikki čoahkkima jorba beavddis lea maid Nuoraidráđi ovddasteaddjái čohkkánsadji.

Okta varrasamos prošeakta lea nuoraide oaivvilduvvon seksuálasátnegirji, mii lea jorgaluvvon anáraš-, nuortalaš- ja davvisámegillii.

Dál Nuoraidráđi ságadoallin doaibmá Risten Mustonen ja várreságadoallin Ánte Veijola. Nuoraidráđi doaimmas lea mielde maid Sámedikki sadjásaš nuoraidčálli Elli-Marja Hetta.

Nuoraidráđđái sáhttá ohcat juovlamánu 1. beaivvi rádjái. Rávvagat ohcamii gávdnojit Nuoraidráđi neahttasiidduin.

Varrasamosat: Sápmi

Váldoođđasat

Varrasamosat

Muualla Yle.fi:ssä