Sápmi |

Sámediggi válljii ságadoallijoavkku, stivrra ja eará luohttámušolbmuid – Yle Sápmi čuovui

Yle Sápmi čuovui Sámedikki válljemiid reálaáiggis dán artihkkalis.

Tuomas Aslak Juuso salasta Tiina Sanila-Aikio
Ovddit válgabaji ságadoalli Tiina Sanila-Aikio salasta ođđa ságadoalli Tuomas Aslak Juuso. Govva: Tuomas Hautaniemi / Yle

Yle Sápmi čuovui dán artihkkalis Sámedikki ortniiduvvančoahkkima nuppi beaivvi. Muitaleimmet reálaáiggis, geat válljejuvvojedje ságajođiheaddjijovkui, stivrii, lávdegottiide, Sámi parlamentáralaš ráđđái, nuoraidráđđái ja anárašáššiid ráđđádallangoddái.

Sámediggi válljii bearjadaga 28.2. ođđa ságadoallin eanodatlaš Tuomas Aslak Juuso, várreságadoallin ohcejohkalaš Anni Koivisto ja nubbin várreságadoallin anárlaš Leo Aikio. Stivrii válljejuvvojedje ságadoallijoavkku lassin lismálaš Magreta Sara, ohcejohkalaš Anne Nuorgam, vuohččulaš Juha-Petteri Alakorva ja čeavetjávrelaš Veikko Feodoroff.

Ealáhus- ja vuoigatvuođalávdegotti jođihišgoahtá ohcejohkalaš Asko Länsman, skuvlen- ja oahppomateriálalávdegotti ja Sámi giellaráđi Tauno Ljetoff, kulturlávdegotti Pirita Näkkäläjärvi ja sosiála- ja dearvvasvuođalávdegotti Karen-Anni Hetta.

Suoma Sámedikki ovddasteaddjin Sámi parlamentáralaš ráđđái válljejedje Pirita Näkkäläjärvi, Anne Nuorgam, Karen-Anni Hetta, Tauno Ljetoff ja Niko Valkeapää.

Girkolaščoahkkimis čuovvovaš njeallje jagi sámiid ovddasta Aslak Pekkala.

Sámedikki anárašáššiid ráđđádallangoddái válljejedje Leo Aikio, Aslak Pekkala, Asko Länsman, Inka Kangasniemi, Anu Avaskari ja Anni Koivisto.

Doaibmaprográmmas 2020–2023 Sámediggi deattuha njealji temá, mat laktasit sámiid buresbirgejupmái ja sámiid eamiálbmotrivttiide

Válgabajis 2020–2023 vuoruhuvvojit sámekulturlága válmmaštallan, sámesoahpamuša ratifiseren, sámiid buresbirgenbálvalusaid ovddideapmi sámeguovllus sihke sámeservošiid giella- ja kulturbálvalusaid doarjun sámeguovllu olggobealde.

Ortniiduvvančoahkkima maŋŋá Sámediggi dieđihii, ahte buot 21 sámediggeáirasa hábmejedje ovttas njealji čuoggá listtu oassin ráđđádallamiid, mat gevvojuvvojedje ortniiduvvančoahkkima vuosttas beaivvi 27.2. ráđđadallanbottus.

Njealji čuoggá listu dohkkehuvvui virggálaččat ovttamielalaččat Sámedikki ortniiduvvančoahkkima nuppi beaivvi sáttaságastallamis, mii guoskai válgabaji doaibma- ja ekonomiijaplána 2020–2023.

Varrasamosat: Sápmi

Váldoođđasat

Varrasamosat

Muualla Yle.fi:ssä