Sápmi |

Sámedikki ságadoalli dolle Presideantta iehčanasvuođabeaidoaluide viđát geardde – Jagi temá oidno čiŋain

Dán jagi Presideantta iehčanasvuođabeaidoaluin temán lea “oktasaš biras” (su. yhteinen ympäristömme).

Sámedikki ságadoalli Tiina Sanila-Aikio ja su isit Leo Aikio buorástahttime Suoma Dásseválddi Presideanta Sauli Niinistö Suoma iehčanasvuođabeaidoaluin jagis 2018.
Sámedikki ságadoalli Tiina Sanila-Aikio ja su isit Leo Aikio buorastahttime Suoma Dásseválddi Presideanta Sauli Niinistö Suoma iehčanasvuođabeaidoaluin jagis 2018. Diibmá Sanila-Aikios leai oaivvis nuortalaš nissona dálvegahpir triiʹviǩ. Su gákti lei čiŋahuvvon guoli dávttiiguin. Govva: Yle Areena

Duorastaga fas máŋggat olbmot čohkkájit TV ovddas ja čuvvot, geat leat beassan ávvudit Suoma iehčanasvuođa Suoma dásseválddi Presideantta šlohttii. Ihttin ávvudit Suoma 101 jagi iehčanasvuođa ja doalut leat Presideantta šloahtas Helssegis nu mot árbevirolaččat.

Sámedikki ságadoalli Tiina Sanila-Aikio ávvuda dánge jagi Suoma iehčanasvuođa Dásseválddi Presideantta šloahtas. Dát lea sutnje viđát geardi, go oassálastá doaluide.

– Doalut mannet jo boares hárjánumiin. Go vuosttaš háve mannen Presideantta doaluide šlohttii, hirpmástuvven das, man gárži doppe lei. TV:s báiki orru stuorát, Sanila-Aikio muitala.

Temá deaivvai bures oktii hohppos čavččain

Dán jagi Presideantta šloahta ávvudoaluid temán lea “oktasaš biras” (su. yhteinen ympäristömme). Temá oidno doaluin nu biebmofálaldagas, go das mot šloahta leat čiŋadan. Sámedikki ságadoalli lohká, ahte temá deaivvaige bures oktii hohppos čavččain.

– Heivii bures, ahte temá lea oktasaš biras. Mus lea leamašan nu hohppos čakča, ahte in leat geargan jurdilitge goarruma ja mearridin, ahte dán háve cokkan doaluide gávtti mii mus lea jo, muitala Sanila-Aikio.

Tiina Sanila-Aikio isidiinnis Leo Aikioin iehčanasvuođabeaivvi doaluin.
Jagi 2016 iehčanasvuođabeaidoaluin Sanila-Aikio oaivvi čiŋahii nuortalaš eamida gahpir šaamsiǩ. Govva: Yle

Dán jagi temá oidno Sanila-Aikio ja su isida Leo Aikio čiŋain.

– Sámi oahpahusguovddáža oahppi lea diŋgojumis dahkan munnje veaskku ja ođđasit geavahuvvon silbbas munnje ja Leoi oktiiheivehuvvon čiŋaid: beallječiŋaid, suorbmasiid, rohkiid, liidneriskku ja čiŋa veskui.

Sanila-Aikio lohká jagi temá leat dehálaš buohkaide. Buhtes, dearvvaš ja ealás biras lea sámekultuvrra vuođđu.

Iehčanasvuođabeaidoalut šloahtas lea bargobeaivi

Vaikko iehčanasvuođabeaivve Presideantta šloahtta dievvá mearrideddjiin, geaid hálddus leat maid sámeáššit, eai ávvubeaivvi ságat gal bearehaga politihka beallái čieras.

– Olbmot leat ávvumielain ja doppe lea somá humadit olbmuin ii nu politihkalaš áššiin, ja nu viiddidit sin oainnu sámeáššiin.

Eanet politihkas hupmu boahtá, jus soames njuolga jearrala sámeáššiin. Sanila-Aikio lohká iehčanasvuođabeaidoalut leat sutnje bargobeaivi.

– Mun lean bovdejuvvon dohko mu virggi bealis ja geahččalan buoremus vuogi mielde ovddastit doppe sámiid.

Yle sádde duorastaga 6.12 njuolggosáddaga Presideantta iehčanasvuođabeaidoaluin Yle TV-kanálas dii: 18.55 - 20.30 ja dii: 20.40 - 22.15.

Tiina Sanila-Aikio jearahallama sáhtát guldalit Yle Sámi Iđit -sáddagis.

Varrasamosat: Sápmi

Váldoođđasat

Varrasamosat