Sápmi |

Sámedikki stivra evttoha, ahte dievasčoahkkin hilgu sámediggeláhkaevttohusa

Sámedikki ságadoalli Tiina Sanila-Aikio muitala, ahte stuorámus sivva hilgunevttohussii lea ráđđádallangeatnegasvuođa eahpelihkosnuvvan, muhto maiddái stuorát ollisvuohta.

sámediggi, saamelaiskäräjät, puheenjohtaja, Tiina Sanila-Aikio
Sámedikki ságadoalli Tiina Sanila-Aikio. Govva: Vesa Toppari / Yle

Sámedikki stivra lea mearridan evttohit Sámedikki dievasčoahkkimii, ahte dat hilgu evttohusa ođđa sámediggeláhkan.

Sámedikki stivra oaivvilda, ahte sámediggelága 9 paragráfa ráđđádallangeatnegasvuohta ii leat ollašuvvan sámediggelága ođasmahttimis dego galggašii.

– Sámedikki mielas borgemánu loahpas ordnejuvvon ráđđádallan lei dušše teknihkkalaš gullandilálašvuohta, mii ii deavdán sámediggelágas ovdanbukton gáibádusa albma ráđđádallamis, muitala Sámedikki ságadoalli Tiina Sanila-Aikio.

– Sámediggi lea ovttas riekteministeriijain hábmen rávačállosa 9 paragráfa ráđđádallangeatnegasvuođas, ja leage hui heahpat, ahte geatnegasvuohta ii ollašuvvan sámediggelága ráđđádallamis eaige Sámedikki ráđđádallanbivdagat váldon vuhtii. Dat ráđđádallamat eai mannan ollenge lága mielde ja dat lea dat stuorámus sivva dasa, manne Sámediggi evttoha dál hilguma, Sanila-Aikio joatká.

Sanila-Aikio mieđiha, ahte jearaldat lea goittotge maiddái stuorát ollisvuođas.

– Dieđusge dál ferte geahččat maiddái dan ollisvuođa, ahte makkár doaimmat stáhtas leamašan sámiiguin ja mo dat leat eahpelihkosnuvvan. Dat lea dat stuorra govva das duogábealde, muhto maiddái dat, mo sámediggelága ođasmahttinproseassa lea mannan.

Sámedikki reivve stáhtaráđđái dán ášši birra sáhttá lohkat dáppe.

Vel vahkku áigi ráđđádallat

Sámediggi čoahkkana gieđahallat sámediggeláhkaevttohusa vuossárgga 24.9. Stáhtaráđđiges gieđahallá láhkaevttohusa čoahkkimisttis 27.9. Stáhtaráđđi mearrida dalle, doalvugo dat láhkaevttohusa riikkabeivviide. Evttohus ii ovdán riikkabeivviide, jos Sámedikki čoahkkin ii dohkket dan.

Tiina Sanila-Aikio vuordáge dál oaidnit, mo stáhtaráđđi reagere reivii.

– Dás lea dál vehá badjelaš vahkku áigi dievasčoahkkimii ja dieđusge dás lea vel vejolašvuohta ráđđádallat. Mii geahččat makkár vástádus stáhtaráđis boahtá min otná reivii.

– Jos láhkaevttohus hilgojuvvo, de dat mearkkaša dan, ahte mii mannat boahtte jagi válggaid ja das ovddosguvlui dálá lágain. Jos dat fas dohkkehuvvo, de mis šaddá viđát jahki, okta liigejahki dán válgabadjái. Dasto mii joatkit dáinna joavkkuin ovddosguvlui, Sanila-Aikio čilge.

Varrasamosat: Sápmi

Váldoođđasat

Varrasamosat

Muualla Yle.fi:ssä