Sápmi |

Sámedikki stivra nammadii doaibmagotti válmmaštallat sámediggelága rievdadeami

Doaibmagotti doaibmabadji álgá borgemánu álggus ja bistá boahtte jagi ođđajagimánu lohppii.

Sámedikki beavdi
Govva: Ville-Riiko Fofonoff / Sámediggi | Saamelaiskäräjät

Sámedikki stivra lea mánnodaga 6.7. čoahkkimisttis nammadan lahtuid ja várrelahtuid sámediggelága rievdadeami válmmaštalli doaibmagoddái.

Nammaduvvon lahtut leat Tuomas Aslak Juuso, Anne Nuorgam, Pirita Näkkäläjärvi, Martin Scheinin ja Kalle Varis sihke várrelahtut Juha-Petteri Alakorva, Anni Koivisto, Veikko Feodoroff, Piia Nuorgam ja Sarita Kämäräinen.

Dan lassin Sámedikki beales áššedovdin doaibmagoddái nammaduvvui Siiri Jomppanen.

Sámedikki stivra ákkastallá válljemiiddis, ahte nammaduvvon olbmuin buohkain lea nana dovdamuš ja máhttu sámeáššiin. Stivra deattuha earenoamážit válljejuvvon čoakkádusa vuoigatvuođalaš máhtu, sámediggelága dovdama ja ráđđádallandáidduid.

– Stivra lea dahkan ovttamielalaččat daid mearrádusaid, muitala Sámedikki ságadoalli Tuomas Aslak Juuso.

Doaibmagotti doaibmabadji lea 1.8.2020–31.1.2021.

Doaibmagoddi válmmaštallá dárbbašlaš rievdadusaid

Doaibmagotti bargun lea válmmaštallat dárbbašlaš rievdadusaid sámedikkis addojuvvon láhkii.

– Ulbmil lea boahtte jagi ođđajagimánu lohppii boahtit evttohusain, mii dasto vuolgá riikkabeivviide Sámedikki gieđahallama bokte, jos dát komitea gávdná dákkár oktasaš geainnu, guđe ládje sámediggelága galgá ovddidit, dadjá Juuso.

Sámedikkis addojuvvon lága dárkkisteapmi lea dárbbašlaš, dasgo lága njuolggadusat leat oassái boarásmuvvan, ja njuolggadusaid doaibmivuođas leat fuomášuvvon váttisvuođat, čállá Sámediggi dieđáhusastis.

– Vuordámuš doaibmagotti bargui lea, ahte sámediggeláhka rievdaduvvogoahtá álgoálbmogiid vuoigatvuođaid vuođul, vuhtii váldimiin KP-soahpamuša geatnegasvuođaid ja gudnejahttimiin UN olmmošvuoigatvuođakomitea addin čovdosiid. Suopma lea čatnasan ollašuhttit UN álgoálbmogiid julggaštusa ja dat galgá oidnot komitea barggus, muitala Juuso iežas vuordámušain doaibmagotti barggus.

Saamelaiskäräjien puheenjohtaja Tuomas Aslak Juuso.
Sámedikki ságadoalli Tuomas Aslak Juuso. Govva: Ville-Riiko Fofonoff / Sámediggi | Saamelaiskäräjät

Stáhta bargagođii lága ođasmahttimiin álgojagi

Stáhta válddii sámediggelága ođasmahttima vuot barggu vuollái dán jagi álggus. Riekteministeriija ásahii álgojagi sámediggelága ovdaválmmaštalli bargojoavkku, man ulbmilin lea guorahallat sámediggelága ođasmahttindárbbuid ovddit láhkanuppástusevttohusa vuođul.

Bargojoavkku čoaggin diehtu ja fuomášumit leat čohkkejuvvon muittuhančállagii. Bargojoavkku doaibmabadji nogai 31.3.2020

Sámediggelága geahččaledje ođasmahttit ovddit ráđđehusbajis, muhto bargu bisánii čakčat 2018, go Sámediggi hilggui dalle dahkkon evttohusa lágas.

Varrasamosat: Sápmi

Váldoođđasat

Varrasamosat

Muualla Yle.fi:ssä