Sápmi |

Sámedikki válgalávdegoddi ii dohkket AHR mearrádusaid ja lea guoddalan áššis

Guoddaleapmi guoská daid iešnjulgemiid, maid válgalávdegoddi suoidnemánus dagai. Válgalávdegoddi lea guoddalan visot gomihemiid, maid AHR lea dássážii sidjiide sádden.

Janne Näkkäläjärvi
Sámiide dát lea stuorra ášši ja AHR livččii áinnas galgan gullat válgalávdegotti, cealká válgalávdegotti ságajođiheaddji Janne Näkkäläjärvi. Govva: Vesa Toppari / Yle

Sámedikki válgalávdegoddi lea maŋŋebárgga guoddalan Alimus hálddahusriektái 16 sierra mearrádusas. Guoddaleapmi guoská iešnjulgemiid, maid válgalávdegoddi dagai suoidnemánus muhtun olbmuid buohta, muhto AHR gomihii daid.

Válgalávdegoddi geavahii iešnjulgema suoidnemánus ja sihkkui 94 olbmo eret válgalogahallamis. Borgemánu álggus fas AHR dieđihii, ahte válgalogahallamis sihkkojuvvon olbmot galget máhcahuvvot dohko.

– AHR lea sádden dássážii válgalávdegoddái 16 gomihanmearrádusa dan 94 iešnjulgemis, muitala válgalávdegotti ságajođiheaddji Janne Näkkäläjärvi.

Go válgalávdegoddi geavahii iešnjulgema 94 olbmo buohta, de loahpaid (nappo 78 iešnjulgema) mearrádusain, dahje gomihemiin ii leat vel diehtu.

Válgalávdegoddi moaitá áššemeannudeami go AHR ii gullan válgalávdegotti dahje Sámedikki.

– Min mielas dás lea meannudanfeaila. Sámiide dát lea stuorra ášši ja AHR livččii áinnas galgan gullat válgalávdegotti, dadjá Näkkäläjärvi.

AHR mearrádusain leat válgalávdegotti mielas navdán, ahte AHR boares mearrádusat čatnasit dán jagi válgalogahallamii, vaikko ON olmmošriektekomitea lea addán nuppelágan ávžžuhusa.

Válgalávdegoddi muittuha, ahte olmmošriektekomitea čovdosiin leat dadjan, ahte ovddit AHR mearrádusat loavkašuhttet sámiid rivttiid. Olmmošriektekomitea celkkii dalle, ahte Suoma stáhta ferte fuolahit das, ahte dákkár loavkašuhttimat eai šat dáhpáhuva dáid válggain.

Varrasamosat: Sápmi

Váldoođđasat

Varrasamosat

Muualla Yle.fi:ssä