Sápmi |

Sámedikki válgalávdegoddi lea guoddalan nuppadassii AHR mearrádusaid

Ođđa guoddaleapmi guoská 40 mearrádusa. Vuosttas guoddaleami válgalávdegoddi dagai 20.8. ja dat guoská 16 sierra mearrádusas.

Janne Näkkäläjärvi
Válgalávdegotti ságadoalli Janne Näkkäläjärvi dadjá, ahte AHR mearrádusa dahkamis lea meannudanfeaila. Govva: Vesa Toppari / Yle

Sámedikki válgalávdegoddi lea guoddalan nuppadassii alimus hálddahusrievtti (AHR) dahkan mearrádusain. Ođđa guoddaleapmi guoská 40 mearrádusa.

– Min mielas dies lea meannudanfeaila ja earenomážit go AHR ii leat gullan min ollege dagadettiin mearrádusaid dahkamis, dadjá válgalávdegotti ságadoalli Janne Näkkäjärvi.

Vuosttas guoddaleami válgalávdegoddi dagai 20.8. ja dat guoská 16 sierra mearrádusas. Guoddaleapmi guoská iešnjulgemiid, maid válgalávdegoddi dagai suoidnemánus muhtun olbmuid buohta, muhto AHR gomihii daid.

Válgalávdegoddi geavahii iešnjulgema suoidnemánus ja sihkkui 94 olbmo eret válgalogahallamis. Borgemánu álggus fas AHR dieđihii, ahte válgalogahallamis sihkkojuvvon olbmot galget máhcahuvvot dohko.

AHR 40 ođđa mearrádusa noađđin válgalávdegotti oainnu mielde leat maid nuppelágan vuoiggalaš gearreguššama loavkideapmi.

AHR presideanta Kari Kuusiniemi lea addán 8.8.2019 Ylei jearahallama, mas son čujuhii AHR:S dalle jođus leahkki iešnjulgemiin dahkkon guoddalemiid guoddaleaddjiide, ahte "lea čielggas, ahte dát olbmot galget máhcahuvvot válgalogahallamii". Dáinna cealkagiin presideanta Kuusiniemi ávaštalai duopmostuolus daid guoddalusáššiid, mat vurdet čovdosa, gieđahallama loahppabohtosa dakkár dábiin, mii loavkašuhttá ášši gieđahalli juhkosa duopmáriid sorjjasmeahttunvuođa ja bealehisvuođa dahje aŋkke oassebeliide ja publihkkii šaddá govva AHR eavttuin gieđahallat guoddalemiid vuoiggalaš gearreguššama prinsihpaid.

Aŋkke 56 máhcahuvvon ruovttoluotta válgalogahallamii

Sámedikki válgalávdegotti ságadoalli Janne Näkkäläjärvi mielde AHR lea sádden dássážii válgalávdegoddái 56 gomihanmearrádusa dan 94 iešnjulgemis, maid válgalávdegoddi dagai suoidnemánus. Näkkäläjärvi mielde AHR mearrádusat bohtet ovttaid mielde ja válgalávdegoddi lea dasto gieđahallan mearrádusaid dan mielde go dat leat boahtán.

AHR attii borgemánu álggus čovdosiid váidagiidda ja celkkii dalle, ahte sámedikki válgalávdegotti iešnjulgenmearrádusat eai leat ollašuhttimis, daningo dain ii leat lága fápmu. Mearrádusat dárkkuhit dan, ahte válgalogahallamis iešnjulgenmearrádusaiguin sihkkojuvvon olbmot galget máhcahuvvot logahallamii.

– Alimus hálddahusriekti burggii min iešnjulgema. Galhan dat mearrádusat leat láhkafámolaččat ja sii leat válgalogahallamis.

Janne Näkkäläjärvi mielde sámedikki válgalogahallamii leat váldojuvvon ruovttoluotta aŋkke dat 56 olbmo, geaid buohta válgalávdegoddi lea dahkan guoddalusa.

Lasihuvvon vuollebajilčálus 30.8.2019 dii 9:39

Varrasamosat: Sápmi

Váldoođđasat

Varrasamosat

Muualla Yle.fi:ssä