Sápmi |

Sámedikkit čoahkkanit duorastaga Ruŧŧii guorahallat sámesoahpamuša čuovvovaš lávkkiid

Suoma sámedikki ságadoalli Tiina Sanila-Aikio sávvá, ahte golmma riikka sámedikkit besset ovttaoaivilvuhtii čuovvovaš lávkkiin.

Tiina Sanila-Aikio
Suoma sámedikki ságadoalli Tiina Sanila-Aikio. Govva: Vesa Toppari / Yle

Suoma, Ruoŧa ja Norgga sámedikkit čoahkkanit odne duorastaga Staarei Ruoŧa beallái seminárii davviriikkalaš sámesoahpamuša birra.

Suoma sámedikki ságadoalli Tiina Sanila-Aikio oaivvilda, ahte go lea gažaldat davviriikkalaš sámesoahpamušas, de ferte maiddái oktasaččat čoahkkanit árvvoštallat hápmosa ja beassat ovttas hállat dan sisdoalu birra.

– Dát oktasaš čoahkkin leamašan jo giđa rájes plánema vuolde ja dál dat dasto ollašuvvá.

Sanila-Aikio muitala, ahte duorastaga deaivvadeamis leat guokte oasi.

– Vuosttaš oasis leat áššedovdit, ráđđádallit ja sámedikkiid ovddasteaddjit. Doppe leat maiddái stáhtaid ovddasteaddjit, dat lea dego rabas dilálašvuohta. Vuosttaš oasi maŋŋá dušše sámedikkiid ovddasteaddjit čoahkkanit gulahallat gaskaneaset.

Sávvá oktasaš oainnu

Tiina Sanila-Aikio oaivvilda, ahte dát áigi lea čoahkkima dáfus vehá váttis, danin go Norgga sámedikkis leat válggat čakčamánus ja Ruoŧa sámedikkisge leat juste leamašan válggat ja sámediggi lea ordniiduvvan.

– Dien dáfus dat lea vehá váttis. Muhto mun jáhkán goittotge, ahte mii dárbbašit dán čoahkkima dán muttus vai sáhttit plánet maiddái čuovvovaš lávkkiid ovddosguvlui, dárbbu mielde.

Sanila-Aikio sávváge, ahte sámedikkiin boahtá čoahkkima oktavuođas oktasaš oaidnu čuovvovaš lávkkiin.

"Livččii buorre oažžut joatkkaráđđádallamiid"

Sanila-Aikio muitala, ahte soahpamuša sisdollui ii sáhte šat dahkat rievdadusaid.

– Muhto dat niesttit, maid mii oaččuimet sáttaságastallamis geassemánu dievasčoahkkimis, dat čájehit dan guvlui, ahte joatkkaráđđádallamiid livččii buorre oažžut.

Buot sámedikkit fertejit dohkkehit davviriikkalaš sámesoahpamuša, muđuid dat ii ovdán.

– Jos okta sámediggi hilgu dan, de dalle dat bisána dasa, muitala Tiina Sanila-Aikio.

Varrasamosat: Sápmi

Váldoođđasat

Varrasamosat

Muualla Yle.fi:ssä