Sápmi |

Sámedikkit háliidit nannet rájiid rasttildeaddji skuvlaovttasbarggu sámeguovlluin

Davviriikkalaš skuvlaovttasbargguin háliidit sihkkarastit Sirpmá ja Ohcejoga skuvlaovttasbarggu ja čielggadit ovttasbarggu vejolašvuođaid eará rádjeguovlluid skuvllain, mat addet sámeoahpahusa.

Skuvlaovttasbarggu bargojoavku
Bargojoavkku jođiheaddji Inger Anne Klemetsen, Arla Magga, Jon Christer Mudenia, Ol-Johan Sikku, Lars Miguel Utsi, Leif Erik Varsi, Mikkel Eskil Mikkelsen, Eila Tapiola, Aura Pieski, Ulla Aikio-Puoskari ja Brita Oskal Eira. Govva: Sámediggi

Norgga, Ruoŧa ja Suoma Sámedikkit leahkastit ođđa siiddu rájiid rasttildeaddji sámi skuvlaovttasbarggu nannema dáfus, dieđiha Suoma Sámediggi.

Sirpmás ja Ohcejogas lea leamašan juo guhká skuvlaovttasbargu, mii doarju sámegiela. Dán háliidit sihkkarastit. Seammás áigot čielggadit ovttasbarggu dili ja vejolašvuođaid eará rádjeguovlluid skuvllain, mat addet sámeoahpahusa.

Sápmelaš skuvlaovttasbarggu ovddideapmi lea oassin Sámi Parlamentáralaš Ráđi mihttomeriid. Norgga Sámediggi jođiha davviriikkalaš bargojoavkku, mas leat mielde Suoma, Ruoŧa ja Norgga Sámedikkiid lassin ovddasteaddjit Ohcejoga ja Deanu gielddain ja lassin Ohcejoga ja Sirpmá skuvllain ja skuvllaid vánhemiid gaskkas.

Ovttasbargu joatkašuvvá jagi bottu maŋŋá

Bargojoavkku bargu lei bisánan jahkái, daningo prošektii eai gávdnan bargi. Bargojoavku čoahkkanii jagi bottu maŋŋá maŋŋebárgga juovlamánu 4. beaivve Kárášjogas. Norgga sámediggeráđi lahttu Mikkel Eskil Mikkelsen bovdii bargojoavkku čoahkkái. Norgga Sámediggi ruhtada ja jođiha barggu.

Jagi álggus bargojoavkku čállin álggaha filosofiija magisttar Arla Magga Anáris. Magga bargá Suoma Sámedikki skuvlen- ja oahppomateriáladoaimmahagas oasseáigásažžan jagi 2019. Suoma Sámedikki ovddasteaddjin bargojoavkkus bargaba Eila Tapiola Ohcejogas ja Ulla Aikio-Puoskari Sámedikki hálddahusas.

Varrasamosat: Sápmi

Váldoođđasat

Varrasamosat