Sápmi

Sámefilmmaid ráidu čájeha karantenaáiggi duohtavuođa Ohcejogas gitta Osloi – Hans Pieski govvii iežas bearraša eallima oanehisfilbman

ISFI
Earret eará dát filmmat leat mielde Oru lea buoret go jođi -filbmaráiddus: Egil Pedersena Fávru speadjalis, Hans Pieski Sáhtašii leat vearrátge ja Ann Holmgrena Vår2020 Govva: Egil Pedersen: Fávru speadjalis / Hans Pieski: Sáhtašii leat vearrátge / Ann Holmgren: Vår2020 (ISFI, Internášunala Sámi filbmainstituhtta)

Karantenaáigi soaitá boktán gávpotbirrasis váillaheami ruoktot Sápmái ja fas Sámis suohtasge jurdagiid das, mo eallin ii leat olus rievdan.

Oktiibuot 15 filmmaža bokte beassá fargga oaidnit dán earenoamáš koronagiđa vásáhusaid sámi geahččanguovllus. Gažaldat lea filbmaráiddus, Oru lea buoret go jođi, masa Internašunála Sámi filbmainstituhtta (ISFI) hástalii sámi filbmadahkkiid oassálastit.

Filbmakonsuleanta Liisa Holmberg illuda sakka: prošeakta lea sutnje čájehan dan, man čeahpes filbmadahkkit Sámis gávdnojit. Son muitala, ahte mielde leat hui iešguđetlágán filmmažat.

– Dat lea earenoamáš geahčastat dasa, ahte maid sámit leat bargan miehtá Sámi koronagiđa 2020 áigge, govvida Holmberg.

Fáttát leat máŋggalágánat, vaikko guovddáštemá leage seamma. Filmmažiin oidno, ahte vánhemat leat leamaš ovttas mánáiguin ruovttus. Holmberg muitala maiddái dakkár temádihká boahtán ovdan, ahte mo sápmelaš sáhttá birget máddin, go miella livčče davás Sámeeatnamii. Historjáge ii leat vajálduvvon: okta filmmaš veardadallá spánskadávdda muittuid otnábeaivái.

Buvttadankoordináhtor Jenna Rasmus lohká, ahte čavga áigetávval ii dihtton, baicce filmmažat ledje hui máŋggabealagat.

– Lei somá oaidnit, ahte doppe lei viehka olu humor maid mielde. Mii buohkat vásihit ja dovdat dan dili, mas mii eallit, mas olles máilbmi lea. Buohkain lea vehá dakkár ballu, dat lea hui duođalaš ášši, muhto doppe lei maid humor mielde, de dat lei somá, muitala Rasmus.

Golmma vahkus jurdagis filbman

Okta filbmadahkkiin, Hans Pieski, lea govven oppa giđa iežas bearraša eallima Ohcejogas, muhto maiddái luonddu. Nuba su filmmažis šattai dokumentáralágan, go čohkkii oktii daid govaid giđa áigodagas.

ISFI filbmaprošeavttas lei oalle jođánis áigetávval, nu Hans Pieskige galggai geargat golmma vahkus filmmažiin. Su filbma oaččui nama "Sáhtášii leat vearrátge".

– Narratiivva muitala mu nuoramus nieida. Dat govve guokte nuorra nieidda eallima karantenaáigge. Maiddái vehá dan, mo mii dáppe davvin lávet muđuige álo rádjat biepmu dálvvi várás, čilge Pieski filmmažisttis.

Son buktá ovdán filmmas biepmu rádjui oasttašeami danin, go koronadili dihte máŋggain sajiin olbmot hahke biebmogálvvuid koronaráddjehusaid dihte oba garrasit. Sámis goittotge leat hárjánan dasa, ahte biebmu galgá álo gávdnot skábes amas šaddat heahtedilli.

Video: Sahtasii leat vearratge
Geahča dá Hans Pieski filmma filbmaseavtti. Video: Hans Pieski

Lovozeros, Guovdageainnus, Helssegis...

Prošektii bohte filmmat earret eará Guovdageainnus, Kárášjogas, Ohcejogas, Anáris, Helssegis, Oslos, Lovozeros ja Gironis. Filmmažiid guhkkodagat leat eanemustá vihtta minuhta.

Sara Margrethe Oskal

Covida buriid ja bahás beivviid

Marja Helander

Suodji

Silja Somby

Guhparastin

Ánne Mággá Wigelius

A Home Truth

Aslak Paltto

Borrat, Biebmat, Báibmat, Ballat

Hans Pieski

Sáhtašii leat vearrátge

Ellen Astri Lundby

Rivgu

Marja Bål Nango

Oru ruovttun beana-19

Ingir Bål Nango

Jovgon-19

Ann Holmgren

VÅR2020

Egil Pedersen

Fávru speadjalis

Lada Suomenrinne, Niki Rasmus

Garjá

Sergey Gavrilov, Ánne Márjá Guttorm Graven

Mo dieppe?

Liselotte Wajstedt

Moai báhtaretne

Joar Nango, Ken Are Bongo

Duorggat doarggistit


Buot filmmat bohtet geasi áigge oaidninláhkái ISFI neahttafilbmabálvalussii.

Varrasamosat

Muualla Yle.fi:ssä