Sápmi |

Sámegiela dáiddus máksojuvvo fargga máŋggageardásažžan Eanodagas – gielddaráđđehus mearridii bajidit giellalasi

Eanodagas ja Ohcejogas mákset olbmuid sámegieldáiddus dál 100–150 euro mánus. Anáris ja Soađegilis leat maid vihkkehallamin, galggašiigo giellalasiid bajidit.

Eurosedlar på mylla.
Sámeguovllu gielddain Ohcejohka ja Eanodat leat mearridan bajidit giellalasi. dovdomassii. Govva: Igor Stevanovic

Eanodaga gielddaráđđehus lea mearridan bajidit giellalasiid.

Boahtte jagi álggus njálmmálaš gielladáiddu giellalassi badjána gielddas 100 euroi mánus. Čálalaš gielladáiddus fas máksojuvvo 150 euro. Sámegiela gielladáiddu galgá čájehit juogo gaskadási gielladutkosiin, studeantadutkosiin dahje juoga eará heivvolaš duođaštusain.

Dán rádjái Eanodagas leat máksán sámegiela njálmmálaš ja čálalaš dáiddus 21,86 euro mánus.

Bajiduvvon giellalassi sáhttá veahkehit rekryteremis

Eanodaga gielddas leat gávnnahan, ahte bajiduvvon giellalassi sáhttá leat ávkin sámegielat bargiid oažžumis gildii. Gielddas leat vásihan, ahte Eanodahkii lea váttis oažžut bargiid dakkár bargguide, main gáibidit sámegiela máhtu.

Gielda lea geahččalan buoridit sámegiela dili dainna, ahte lea dorjon bargiidis sámegiela oahppama ovdamearkan mieđihemiin virgelobiid sámegiela oahpuid várás. Gielda lea ohcan ja ožžon bargiid skuvlemii doarjaga vuoigatvuođaministeriijas. Jagis 2019 stáhtadoarjagiin leatge golbma Eanodaga gieldda bargi oahpahallan sámegiela.

Eanodaga gielddaráđđehus guorrasii giellalasiid bajideapmái, go Sámedikki giellaráđđi rámiidii Ohcejoga gieldda mearrádusa bajidit sámegielat bargiid giellalasi. Giellaráđđi ávžžuhii maid eará sámeguovllu gielddaid bajidit giellalasi seamma dássái go Ohcejohka.

Ohcejoga gielda mearridii álgojagis 2019 bajidit iežas gieldda bargiid giellalasiid dovdomassii. Ohcejogas njálmmálaš gielladáiddus mákse jagi 2018 rádjái 11,77 euro mánus, ja njálmmálaš ja čálalaš dáiddus 15,14 euro mánus. Dán jagi rájes giellalassi leamaš Ohcejogas njálmmálaš gielladáiddus 100 euro mánus, ja njálmmálaš ja čálalaš sámegiela máhtus bargiide leat máksán 150 euro mánus.

Anár ja Soađegilli válmmaštallet giellalasi bajideami

Sámegielat bargiid giellalasi mákset dábálaš bálkká lassin ja giellalasi sturrodat meroštallojuvvo gieldda bargiid virge- ja bargoeaktosoahpamušas.

Uhcimus submi, man gielddat galget máksit giellalassin, lea njálmmálaš gielladáiddus 11,77 euro mánus. Njálmmálaš ja čálalaš dáiddus giellalassi lea virge- ja bargoeaktosoahpamuša mielde 15,14 euro mánus.

Ovdamearkka dihte Anára gielddas mákset dál bargiide sámegiela máhttimis vuolimus submi, 11,77 dahje 15,14 euro mánus.

– Anára gielda lea ovttas Ohcejogain, Eanodagain ja Soađegiliin válbmemin sámi giellastrategiija, man oktavuođas giellalasi sturrodagage vihkkehallet. Anára sámegielaid giellastrategiija boahtá gieldda orgánaid gieđahallamii álgojagis 2020, dadjá Anára hálddahushoavda Mari Palolahti.

Soađegili gielddas bargiide leat máksán sámegiela dáiddus vehá eanet go Anáris. Submi lea Soađegilis 30 euro mánus. Maiddái Soađegilis leat vihkkehallamin, galgetgo bajidit sámegiela giellalasi.

– Ášši lea válmmaštallamis ja gieđahallojuvvo Soađegili gieldda orgánain áramustá boahtte jagi, dadjá hálddahushoavdda sadjásaš Eini Kivilompolo.

Varrasamosat: Sápmi

Váldoođđasat

Varrasamosat

Muualla Yle.fi:ssä