Sápmi |

Sámegielaid gáiddusoahpahusfidnu álgá – Magga álggahan koordináhtorin ja Tapiola válljejuvvon prošeaktahoavdan

Sámedikki ja Ohcejoga gieldda oktasaš Sámegielaid gáiddusoahpahusa pilohtafidnu álgá, go Ohcejoga stivra lea vuos dohkkehan fidnu iežasruhtadanoasi.

Arla Magga
Sámegielaid gáiddusoahpahusfidnu koordináhtor filosofiija magisttar Arla Magga. Govva: Johanna Alatorvinen / Sámediggi

Oahpahus- ja kulturministeriija mieđihii gieskat Ohcejoga gildii 429 000 euro stáhtadoarjaga sámegielaid gáiddusoahpahusa lágideapmái. Ulbmilin lea fállat sámeoahppiide sámeguovllu olggobealde davvisámegiela, anárašgiela ja nuortalašgiela vuođđooahpahusa gáiddusoahpahussan.

Sámedikki ja Ohcejoga gieldda oktasaš Sámegielaid gáiddusoahpahusa pilohtafidnu álgá, go Ohcejoga stivra lea vuos dohkkehan fidnu iežasruhtadanoasi. Stivra čoahkkana boahtte háve vuossárgga 18.6.2018.

Sámedikki skuvlenčálli Ulla Aikio-Puoskari sávvá, ahte buot manná gielddastivrras bures ja jáhkká, ahte ášši manná čađa. Sámedikkis lea juo prošeaktakoordináhtor álggahan barggus: prošeaktakoordináhtorin sámedikki skuvlen- ja oahppomateriáladoaimmahagas bargá filosofiija magisttar Arla Magga.

Ohcejoga čuvgehuslávdegoddi lea mannan vahkus válljen prošeaktahoavdan luohkáoahpaheaddji Eila Tapiola. Son ii leat vel almmuhan, váldágo barggu vuostá. Prošeaktahoavda galgá álggahit barggus borgemánu álggus.

Prošeaktakoordináhtor sávvá, ahte fidnu vástida sámemánáid dárbbuide

Sámegielaid gáiddusoahpahusa pilohtafidnu ordnejit ovttasbarggus Sámediggi ja Ohcejoga gielda. Sámediggi koordinere barggu riikaviidosaččat ja lea čohken juo giđa mielde ohppiid. Dan barggu joatká dál prošeaktakoordináhtor Arla Magga.

– Dál vuosttažin mun lean joatkán dan ohppiid kártema ja ohppiid loguid dárkkisteami, ahte geat leat beroštuvvan dan gáiddusoahpahusas, man sámegillii ja mii lea daid ohppiid luohkká čakčat.

Magga bargá prošeaktakoordináhtorin goit jagi lohppii. Ođđa barggus son lea álggahan movttegis mielain.

– Dát lea aivve earálágan bargu maid mun lean ovdal bargan. Mun lean jorgalan ja leamašan oahppomateriálabargin ovdal. Dát lea hui miellagiddevaš bargu. Mun vuorddán gal iluin, ahte mii dás boahtá.

Gáiddusoahpahusfidnu lea Magga mielas dehálaš dan dáfus, ahte máŋgii lágašoahpahusa ii leat vejolaš lágidit ohppiid loguid dihte, ja oahppiin sáhttá lea hui earálágan sámegiela máhttu.

– Muhtun oahppis sáhttá leat eatnigielat sámegiela máhttu ja nuppis fas vierisgiela dássi dahje nuppi giella, ahte dat dárbbut leat hui iešguđege láganat, nu mu mielas dat fidnu gal vástida hui bures dasa. Sávan, ahte dat lihkostuvvá.

"Dál beassat ovddosguvlui"

Sámedikki skuvlenčálli Ulla Aikio-Puoskaris lea viehka buorre dovdu das, ahte prošeakta lea viimmat vuolgimin johtui. Ášši leat guhká vuodján Sámedikkis.

– Mii leat áigá juo fuolastuvvan das, ahte stuorámus oassi min mánáin ja nuorain eai oaččo ollenge oahpahusa iežaset gielain. Dál mii beassat goittotge vehá ovddosguvlui dainna áššiin, lohká Aikio-Puoskari.

Ulla Aikio-Puoskari
Sámedikki skuvlenčálli Ulla Aikio-Puoskari lea duđavaš, go gáiddusoahpahusfidnu lea vuolgimin johtui. Govva: Eljas Niskanen / Yle Sápmi

Fidnu ruhtadeapmi lea mearriduvvon jagi 2020 lohppii. Dasto áigot Sámediggi ja Ohcejoga gielda ovttas gieđahallat dan, leago dárbu joatkit fidnuin vai isketgo oažžut fásta ortnega lágidit sámegielaid gáiddusoahpahusa riikkaviidosaččat, muitala Aikio Puoskari.

– Dát lea nugo vuosttaš lávki dasa. Mii hálidivččiimet dieđusge, ahte buot sámi mánáin ja nuorain miehtá riikka livččii albma, sihkkaris vejolašvuohta oažžut sámegielaid oahpahusa beroškeahttá das, gos sii orrot. Dálhan dat leamaš hui eahpesihkkaris vuođu alde goit dán rádjái.

Fidnu áigge lea maiddái ulbmilin kártet daid váttisvuođaid, mat laktásit oahppolágaide ja oahpahusa ruhtadeapmái ja raporteret dain ministeriijai, ja dahkat evttohusaid das, man láhkái oahpahusa sámeguovllu olggobealde sáhtášii oažžut bistevaš vuođu ala.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä