Sápmi |

Sámegielaid ođđa gáiddusoahpahusfidnu lea nu bivnnut, ahte dan viiddidit maiddái ovdaskuvlii – ain geargá almmuhit boahtte lohkanjahkái

Sámedikki ja Ohcejoga gieldda gáiddusoahpahusfidnui leat almmuhuvvon boahtte lohkanjahkái badjelaš 60 oahppi.

Eila Tapiola.
Sámegielaid gáiddusoahpahusfidnu prošeaktajođiheaddji Eila Tapiola. Govva: Vesa Toppari / Yle

Sámegielaid gáiddusoahpahus geasuha Suomas. Sámedikki ja Ohcejoga gieldda oktasaš gáiddusoahpahusfidnui leat oassálastán dán dálvve sulaid 50 máná ja boahtte lohkanjahkái 2019–2020 oahpahussii leat almmuhuvvon badjelaš 60 oahppi.

Jearaldat lea pilohttafidnus, mainna fállet davvisáme-, anáraš- ja nuortalašgiela vuođđooahpahusa gáiddusoahpahussan sámeguovllu olggobealde guokte diimmu vahkkus.

Prošeaktajođiheaddji Eila Tapiola lea ilus, go oahppiid mearri lassána ain, ja maiddái ođđa gielddain leamaš beroštupmi searvat prošektii. Son oaidná áššái máŋga siva.

– Mun jáhkán dat lea buorre beaggin min fidnus ja ahte mii leat nagodan ordnet dan gáiddusoahpahusa nu, ahte dat motivere oahppiid studeret sámegiela. Dan lassin mii ovttasbargat gielddaiguin ja skuvllaiguin nu, ahte sii maid dihtet mii dáhpáhuvvá ja maid mii vuordit sis.

Tapiola jáhkká, ahte diehtu sámegielaid gáiddusoahpahusfidnus lea johtán vánhemiid bokte.

– Fuolaheaddjit leat gullan dan prošeavtta birra ja leat háliidan mánáidasaset dalle sámegiela oahpahusa. De mii leat váldán gildii oktavuođa, ahte dakkár vejolašvuohta lea dál ja gielddat leat leamaš miehtemielalaččat álgit dan prošektii.

Eila Tapiola muitala, ahte sis livččii garra hállu álggahit maiddái logahatoahpuid boahtte čavčča. Dat lea goittotge gitta das, leatgo sis dalle studeanttat logahaga bealde. Boahtte lohkanjagi sii álggahit sámegielaid oahpahusa maiddái ovdaskuvlaoahppiide.

Oahpahusa heivehit dási mielde

Vaikko albma almmuhanáigi gáiddusoahpahussii lea jo nohkan, vel ii leat menddo maŋŋit almmuhit mánáid dasa. Dál gánneha dattetge doapmat.

– Lohkanortnegiid dihte gánneha leat nu jođán go vejolaš ja almmuhit máná oahpahussii. Vai mii sáhttit bargat lohkanortnegiid ja almmuhit daid jo skuvllaide, dadjá Eila Tapiola.

Prošeavttas leat juohkán oahpahusjoavkkuid sihke agi ja gielladási mielde. Sámegiela sáhttá álgit lohkat iežas eatnigiellan maiddái nu, ahte ii ovdal leat oahppan sámegiela gostege.

– Dieđusge maiddái dakkár oahppit leat buresboahtimat, geat jo máhttet sámegiela. Oahpahus heivehuvvo mánáid dási mielde, Eila Tapiola muitala.

Gáiddusoahpahusfidnus lea ruhtadeapmi dán vuoro jagi 2020 lohppii.

Varrasamosat: Sápmi

Váldoođđasat

Varrasamosat

Muualla Yle.fi:ssä