Sápmi |

Sámegielaid vahkku álgá – virtuáladáhpáhusat buktet gollegiela oidnosii

Sámi giellavahkku čalmmustahttá sámegielaid dál nuppi háve. Geahča, makkár prográmma sierra doaibmit ordnejit.

giellavahkku
Sámi giellavahkku lea 19.-25.10.2020. Govva: Sámediggi

Sámegielaid vahkku álgá odne vuossárgga 19.10. ja bistá gitta sotnabeaivái 25.10.

Vahku ulbmilin lea oažžut sámegielaid eambbo oidnosii almmolašvuođas ja loktet máhtu sámegielaid birra. Suoma Sámediggi ollašuhttá sámegielaid vahku ovttasbarggus Norgga ja Ruoŧa Sámedikkiiguin.

Sámediggi ávžžuha neahttasiidduinis, ahte sámegielaid sáhttá buktit ovdán earret eará nu, ahte bargá vaikkoba máidnosiid dahje biebmolisttuid sámegillii, dearvvaha sámegillii ja geavaha sámegielat báikenamaid.

Aŋkke Sámi Giellagáldu, Deanuleagis sámástit -prošeakta, Sámi oahpahusguovddáš ja sámegiela gáiddusoahpahusa pilohttafidnu ordnejit prográmma giellavahku gudnin. Dasa lassin Sámediggi fállá iežas prográmma, mii gávdno Sámedikki neahttasiidduin.

Juohke beaivve okta ođđa sátni, neahtas maid sámegieldiimmut

Sámi Giellagáldu searvá sámegielaid vahkkui nu, ahte dat almmuha juohke beaivve vahku áigge ođđa normerejuvvon sániid Facebook-siidduinis.

– Dat leat áigeguovdilis sánit, mat laktásit dán dillái mii lea dál. Dat govvidit oalle bures dan ođđa áigodaga ja servodaga, muitala sámi giellaáššiidčálli Marko Marjomaa Buorre iđit Sápmi -sáddagis.

Sámi gáiddusoahpahusfidnu ja Sámi oahpahusguovddáš ordnejit sámegieldiimmuid neahta bokte maŋŋebárgga, gaskavahku ja duorastaga. Diimmut leat čujuhuvvon dihto ahkejovkui, muhto dat leat buohkaide rabas. Fidnu neahttasiidduin sáhttá oahpásmuvvat oassálastinrávvagiidda ja oahpahusa áigetávvalii.

Deanuleagis sámástit ordne maid prográmma, galggai goit šluhttet oasi

Deanuleagis sámástit -prošeakta ordne maiddái dáhpáhusaid. Deanuleagis sámástit -prošeavtta ulbmilin lea gáhttet Deanuleagi sámegiela ja árbedieđu.

Prošeavtta hoavda Kati Eriksen goittotge muitala, ahte Norgga ođđa koronaráddjehusaid dihte sii leat gártán šluhttet oasi dáhpáhusain.

Prošeavtta dáhpáhusain gávdno diehtu Facebook-siiddus ja dan ávžžuha maid Eriksen čuovvut varas dieđu várás. Ovdamearkka dihte sotnabeaivve 25.10. ordnejuvvo Deanuleagi virtuála Ártegis ságat -dáhpáhus.

Maiddái Yle Sámi tv- ja rádiosáddagiin ja neahttaartihkkaliin oidnojit ja gullojit sámegielat olles vahku.

Varrasamosat: Sápmi

Váldoođđasat

Varrasamosat

Muualla Yle.fi:ssä