Sápmi |

Sámegielaide lea váttis oažžut dulkka – dulkonskuvlejupmi álgá boahtte čávčča

Skuvlejumis ráhkadit málle sámegielaid dulkaskuvlejumi váras.

Tiisu-Maria Näkkäläjärvi.
Sámi oahpahusguovddáža virtualaskuvlla plánejeaddji Tiisu-Maria Näkkäläjärvi muitala, ahte skuvlejupmi ollášuhttojuvvo máŋggahámát oahppun. Govva: Inger-Elle Suoninen

Boahtte čavčča álgá sámegielaid dulkonskuvlejupmi. Oahppu gullá oassin Sámi oahpahusguovddáža, Oulu Universitehta Giellagas-instituhtta ja Diakoniija-ámmátallaskuvlla oktasaš sámegielaid dulkon -fidnui.

Fidnu álgá boahtte jagi álggus skuvlema plánemiin ja organiseremiin. Ieš skuvlejupmi álggahuvvo čakčat ja dat 25 oahppačuoggá oahppoollisvuohta bistá ovtta oahppojagi.

Skuvlejupmi ordnejuvvo anáraš-, nuortalaš- ja davvisámegielaide. Skuvlejupmái váldet mielde oktiibuot 15 studeantta.

Sámi oahpahusguovddáža virtuálaskuvlla plánejeaddji Tiisu-Maria Näkkäläjärvi muitala, ahte ohppui sáhttet álgit maid olbmot, geat leat barggus go skuvlejupmi ollašuhtto máŋgga hámát oahppun. Máŋgga hámát oahpuin studeren dáhpáhuvvá sihke gáiddus- ja lagašoahpahussan.

– Studeanttas galga leat vuolit dahje bajit allaskuvladutkkus ja dieđusge nana sámegiela máhttu. Skuvlejumi plánemis giddejuvvo fuomášupmi maid dasa, ahte sámegielaid dulkomii dárbbašuvvo sámekultuvrra dovdamuš ja dat lea maid oahppoplánas, muitala Näkkäläjärvi.

Ulbmilin lea hukset málle, man vuođul lea vejolaš ordnet sámegielaid dulkaskuvlejumi

Suoma bealde sámegielat dulkkaid sáhttá measta rehkenastit suorpmaiguin. Sámedikki čoaggin dieđuid mielde anárašgiela ja nuortalašgiela dulkkat leat vihtta goabbáge gielas. Davvisámegielasge listtus leat dušše logi dulkka.

Suomas leat máŋga oahppogeainnu mot šaddat dulkan. Universitehtat fállet dulkonoahpu mii sáhttá ovdamearkka dihte leat oassin eará universitehtaoahpuid. Ámmátallaskuvllas fas sáhttá gazzat dulkka dutkosa man maŋŋá oažžu dutkkusnama dulka AMK.

Dulkonskuvlejumi čađahan olmmoš oažžu duođaštusa, ahte son lea vázzan dákkár skuvlejumi ja son sáhttá maid doaibmat dulkan.

Sámegielaid dulkon -fidnu ulbmilin lea vástidit dulkadárbbuide, mat sámeguovllu gielddain leat ja maiddái hukset málle, man vuođul boahttevuođas lea vejolaš ordnet dulkaskuvlejumi sámegielaide.

Sámegielaid dulkon -fidnu lea gieskat ožžon Eurohpa sosiálaruhtaráju bokte badjelaš 190 000 euro sturrosaš ruhtadeami. ESR ruhtadeapmi lea sullii njeallje viđatoasi fidnu olles ruhtadeamis. Loahppa viđadas ruhtadeamis boahtá sámeguovllu gielddain (Anár, Ohcejohka, Eanodat), Sámedikkis, Oulu universitehtas ja Diakoniija-ámmátallaskuvllas.

Sámegiela dulkondárbbuide váttis gávdnat dulkka

Peter Culley.
Fitnodatdoalli Peter Culley. Govva: Priváhta

Arctic Language Company Oy lea fitnodat Roavvenjárggas mii fállá dulkoma lassin maiddái jorgaleami ja giela oahpahusa. Fitnodatdoalli Peter Culley muitala, ahte sámegielat dulkka gávdnan lea váttis.

– Dat lea hástaleaddji, juohke háve. Dego diehtit nu leat golbma sámegiela anárašgiella, nuortalašgiella ja davvisámegiella ja dávvisámegiella lea dat eanemus hástaleaddji, lohká Culley.

Culley muitala, ahte ovtta háve sii eai leat bastan fállat dulkonbálvalusa go eai gávdnan dulkka. Son lohkáge sámegielaid dulkonskuvlejumi leat hui positiivalaš ášši.

– Eanet dulkkaide lea dárbu álot, lohká Culley.

Varrasamosat: Sápmi

Váldoođđasat

Varrasamosat

Muualla Yle.fi:ssä