Sápmi |

Sámegielat bearašteáhter "Pippi Nallesuohkku" joavdá Suoma beale Sápmái

Čájálmasa beassá oaidnit boahttevaš beivviid Ohcejogas, Anáris ja Vuohčus.

Marte Fjellheim Sarre, Mary Sarre, Nils Henrik Buljo.
Pippi neaktá čájálmasas Marte Fjellheim Sarre, bolesguoktá Mary Sarre ja Nils Henrik Buljo. Govva: Per Heimly

Beaivváš-teáhtera ođđa čájálmas "Pippi Nallesuohkku" joavdá otne bearjadaga Suoma beale Sápmái.

Teáhterčájálmas čuovvu girjjiin ja filmmain oahpes, máilmmi gievrramus nieiddaža muitalusa, muitala Beaivváža diehtojuohkinjođiheaddji Brita Triumf.

– Muitalus lea oalle justa nu mo dat lea oidnon filmmain ja girjjiin, go Pippi lea fárren Villa Villekullái ja de deaivvada Tommiin ja Annikain. Das dat de vuolgá, de bohtet dieđus dat politiijat, rievvárat ja visot dat, mat lávejit oidnot doppe.

– Muhto dat mii lea dieđus erenoamáš min Pippis lea dat, ahte Pippi, su ustibat ja buohkat earát hupmet sámegiela, Triumf muitala.

Čájálmas ii leat oaivvilduvvon dušše mánáide, muhto baicce buohkaide.

– Ráves olbmot ožžot maid roahkka boahttit geahččat, dat lea hui somás ja fiinna vásáhus, Triumf rábmo.

Pippi Nallesuohkku čájehuvvui vuosttas háve bearjadaga golggotmánu 5. beaivve Guovdageainnus. Suoma beale Sámis čájálmasa beassá oaidnit Ohcejohtnjálmmi skuvllas otne bearjadaga 12.10. diibmu 18, Anáris Sajosis ihttin lávvardaga 13.10. diibmu 17 ja Vuohču skuvllas vuossárgga 15.10. diibmu 18.

Vuosttas sámegielat Pippi-čájálmasa lea bagadallan Elle Sofe Sara. Eanet čájálmasa sisdoalus, neavttáriin, áigetávvaliin ja bileahtain sáhttá lohkat Sámi Našunálateáhter Beaivváža neahttasiiddus.

Varrasamosat: Sápmi

Váldoođđasat

Varrasamosat