Sápmi |

Sámegielat duodjegirjjit geasuhit – "Lešgo oktage, man in livčče lohkan"

Lappi girjerádjosiid eanemus luoikkahuvvon sámegielat girjjit leat eanaš duodjegirjjit.

Video: Jouni S. Laiti
Sámegielat girjjiin eandalii duodjegirjjit geasuhit. Video: Yle Areena.

Lappi girjerádjosiid sámegielat fálaldagas geasuhit eandalii duodjegirjjit. Maŋimuš guovtte jagi áigge logi eanemus luoikkahuvvon sámegielat girjjis sullii bealli leat duodjegirjjit. Eará bivnnuhis girjjit leamašan giellaoahppagirjjit ja mánáidgirjjit.

Okta eanemus Davvi-Suoma girjerádjosiin luoikkahuvvon sámegielat girjjiin leamaš maŋimuš jagiid áigge Sámmol Jon Jovnna, Jouni S. Laiti garraduoji oahppogirji Garraduodji. Laitis lea jurdda, manin duodjegirjjit geasuhit.

– Doaivvošin, ahte servodatovdáneapmi livččii manname dan guvlui, ahte dakkár giehtabargu ja diekkár ii nu hohppos bargu livččii maid eanet bivnnut dán áigái. Dathan lea duođaštuvvon, ahte duodjefáttát ja dáiddafáttát leat buorrin olbmo millii maiddái, smiehtada Laiti.

Garraduodji-girji
Jouni S. Laiti Garraduodji-girji lea okta eanemus luoikkahuvvon sámegielat girji. Govva: Xia Torikka / Yle

Guhká bargan duodjeoahpaheaddji Maire Saijets oaidná, ahte maiddái duodjekurssat leat sivvan duodjegirjjiid luoikkaheapmái.

– Dathan gal leat movttiidahttán dat kurssat olbmuid duddjot, danin dat luoikkahit doppe girjerájus daid girjjiid. Ja dan maŋŋá dat lávejit alcceset oastit daid, árvala Saijets.

Saijets lea iešge ovdal luoikkahan duodjegirjjiid, muhto dán áigge dasa ii leat šat dárbu.

– Mushan gal leat jo measta visot dat girjjit mat leat almmustuvvan, mojohallá Saijets.

"Čiekŋut eanet kultuvrii"

Okta dain, gii lea viššalit duodjegirjjiid luoikkahan, lea Anneli Kuhmonen.

– Lešgo oktage dakkár, man in livčče lohkan dahje geahčadan, son árvala.

Kuhmonen lea geavahan earet eará goarrun-, čuoldin- ja garraduodjegirjjiid. Susge lea jurdda, manin duodjegirjjit geasuhit.

– Várra dat, ahte olbmot háliidit čiekŋut vel eanet iežaset kultuvrii. Ja dálhan máilmmis lea treanda, ahte giehtaduojit leat in. Dat leat terapevttalaččat, go oaidná maid oažžu gieđaiguin áigái.

Jouni S. Laiti oaivvilda, ahte girjji vuođul sáhttá fidnet buori vuođu duddjomii.

– Doppehan fidne vuođđodieđu ja iešhan ferte heivehit dan dieđu dasto. Lean munge ieš dalle vuosttaš gietkama duddjon girjji vuođul, ahte gal mun doaivvun dat lihkostuvvá.

Maiddái Maire Saijets oaivvilda dan leat vejolaš.

– Jos lea buorre girji, de mu mielas gal hui guhkás birge dainna.

Varrasamosat: Sápmi

Váldoođđasat

Varrasamosat

Muualla Yle.fi:ssä