Sápmi |

Sámegielat mánáidgárddi oahpaheddjiid ja hoavddaid skuvlegohtet čakčat 2022 – magistara dutkosa sáhttá čađahit beannot jagis

Jagi 2030 rájes gáibiduvvo mánáidgárddi hoavddain bajásgeassindiehtagiid magistara dutkkus. Oulu universitehta lea juo ráhkkanišgoahtán, ahte ordne ođđa gáibádusaid vuođul mánáidgárddi ja árrabajásgeassima oahpaheaddjiide beannot jagi skuvlejumi. Ohcanáigi lea giđđat 2022.

kielâpiervâl
Sámegielat árrabajásgeassima fállet maid giellabeasit. Govva: Anneli Lappalainen / Yle

Jagi 2030 rájes mánáidgárddi hoavddain gáibiduvvo bajásgeassindiehtagiid magisttar dutkkus. Oulu universitehta háliida skuvlet maiddái sámegielat guovlluide gelbbolaš mánáidgárddi hoavddaid, muitala Oulu universitehta lektor Taina Kyrönlampi.

– Árrabajásgeassima kvalitehta leamašan hui girjját juoba dallege, go lea seamma ássanbiras, muitala Kyrönlampi ja dadjá, ahte leš dal mánná gos guovllus Suoma beare, de livččii vejolašvuohta oaččut seamma buorre kvalitehta árrabajásgeassimis.

Skuvlejupmi lea oaivvilduvvon árrabajásgeassima oahpaheddjiide, mánáidgárddi oahpaheddjiide ja daidda, geat háliidit iežaset skuvlet bajásgeassindiehtagiid magisttarin.

– Skuvlen ordnejuvvo fierpmis ja moadde beaivve lágašoahpahussan. Oassálastit sáhttet studeret ruovttus ja oahpuid lea vejolaš laktit iežas bargui. Skuvlejupmi duvdá bargoeallima, muitala Kyrönlampi.

Taina Kyrönlampi
Oulu universitehta lektor Taina Kyrönlampi giktala ohcat skuvlejupmái. Govva: Antti Karppinen

Mánáidgárddi oahpaheaddji sáhttá čađahit bajásgeassindiehtagiid magistara dutkosa beannot jagis. Skuvlejupmái sáhttá ohcat boahtte giđa.

– Skuvlejupmi bistá beannot jagis guovtte jahkái, dadjá Kyrönlampi

Sii háliidit boktit dál mánáidgárddi ja árrabajásgeassima oahpaheaddjiid ohcalit gazzat oahpuid. Sii sávvet, ahte ohcci livččii dahkan oalgeávnnasoahpuid 25 oahppočuoggá. Dálle skuvlenáigi oatnu nu, ahte dán sáhttá čađahit beannot jagis.

Kyrönlampi sávvá, ahte Anáris ja Ohcejogas boađášedje olbmot skuvlejupmái. Dan lagašoahppooasi maŋŋá sáhttá studeret barggu oktavuođas ja iige dárbbaš ássat ja johtit Oulus.

Kyrönlampi ávžžuha studeret ovdal gihtii oalgeávdnasa, go dat dahká álkibun studeret bajásgeassindiehtagiid magistara čiekŋudahtti oahpuid.

Juos lea ovdamearkka dihtii sosionoma dutkkus, de gánneha čielggadit, maid oahpuid ferte čađahit ovdalgo ohcá studeret. Son bivdá váldit oktavuođa dán ášši olis sidjiide ja sin dieđagotti ohcanbálvalusaide.

Bajásgeassindiehtagiid magistarat hovdejit boahttevuođas mánaidgárddiid

Vuođđooahpahusa bealdi skuvllaid rektorat ja oahpaheaddjit leat magistarat. Árrabajásgeassin lea oassi dan oahpahus- ja bajásgeassinortnegis. Dán bokti gelbbolašvuođa gáibádusat dahkko seammán mii lea vuođđoskuvlla rektoriin. Juos jurddaša mánáidgárddi hoavdda barggu, de son lea pedagogalaš jođiheaddji.

Pedagogalaš hovdii áigeguovdilis dutkandiehtu lea ánolaš nu, ahte sáhttá jođihit buorre bohtosiiguin mánáidgárddi, oaivvilda Kyrönlampi.

Bajásgeassindiehtagiid magistara dutkkus lea viiddis. Das lea vejolašvuohta čađahit rávesolbmuid oahpaheapmái oaivvilduvvon pedagogalaš oahpuid ja maiddái hálddahusbargguide ja dutkanbargui oaivvilduvvon oahpuid.

Magisttardutkkus addá ollu vejolašvuođaid, rámida Kyrönlampi ja muitala, ahte dán skuvlejumis lea vuođđun ovddidit mánáidgárddi ja árrabajásgeassima jođiheami.

Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä