Sápmi |

Sámegielat Mumenfilbmii ohcet jietnaneavttáriid – Riddu Riđđus sáhttá geahččalit dubbet

Sara Margrethe Oskal lea bargamin Mumen-filmmain ja lea dál ohcamen jietnaneavttáriid sámegielat veršuvdnii. Sámegielat filmma premieara galggašii leat juovlamánus, nugo váldogielat Mumen-filmmaid premiearatge.

Jietna: Muumit ohjelma saamenkieli tekstitys
Jietna

Oskal oaivvilda, ahte jietnaneaktin lea hui dehálaš bargu dan dihte go jietna lea dat, mii ovttas govaiguin ja musihkain guoddá filmma.

– Mun lean dál jorgaleamen dan mánusa ja seammás ferten álgit ohcat daid neavttáriid ja das šaddá hui speanta. Dat leat dieđusge dat váldokaraktearat, main lea dat váldobargu, nugo ieš dat Mumen. Dieđusge dat muitaleaddjige lea hui dehálaš. Ja de leat smávva karaktearat vel dasa lassin.

Oskal ii leat vel riekta gávdnan olbmo gii galgá leat ieš Mumen, muhto son lea gal smiehttan, geat livčče heiven dan bargui.

– Mun áiggun iskat gávdnojitgo neavttárat maid mun in oba jurddašge sáhtáše neaktit, ja dan dihte mun bovden olbmuid boahtit dakkár jietnageahččaleapmái doppe Riddu Riđus bearjadaga ja lávvardaga. Mun doalan dakkár jietnaneaktiniskama, ahte de dahkat nu mot jo lávetge dahkat go lea dakkár jietnaaudition, ahte galgá dieid replihkaid geahččalit dadjat ja seammás geahččat dan filmma.

Ođđa buvttadeapmi

Sara Margrethe Oskal muitala, ahte olbmot geat galggaše beassat filbmii jietnan, galggaše váldit vuođu originála jienas.

– Nu dat lea álo go don galggat dubbet. Ja de don dieđusge ozat neavttára, gii sulastahttá dan jiena, dahje gean jietna sulastahttá dan originála jiena. Das dat vuolgá.

Oskal ii goittotge ávžžut aivve áddestallat boares Mumeniid.

– Mumen karakteara dieđusge lea Mumen, das ii beasa eret. Ja dat leat dat klassihkalaš muitalusat maid Tove Jansson lea čállán. Muhto de ii galgga šat smiehttat, ahte dat sulastahttá dan maid ovdal lea oaidnán, ovdamearkka dihte maid tv:s lea oaidnán sámegillii. Dat ii leat álgitge dat seamma filbma. Dat lea áibbas eará buvttadeapmi.

Smiehttan nammaevttohusaid

Oskal muitala, ahte buot karaktearat eai leat mielde ođđa filmmas, mat leat leamašan Mumen tv-ráiddus mielde. Son muitala, ahte lea smiehttan muhtin karaktearaide ođđa namaid.

– Dán filmmas, mii bistá lagabui beannot diimmu, das eai leat álgitge nu olu karaktearat mielde. Dieđusge doalahan dieid namaid, mat mu bealljái orrot vuohkkasat, muhto de lean smiehttan, ahte ledjego buot dat namat liikká vuohkkasat, mat dalle ledje jorgaluvvon.

– Mun lean čálášan vehá olbmuin, jearran dan Ártegis ságat -siiddus Facebookas, ja diskuteren muhtun namaid ja nammaevttohusaid. Dat lea hui miellagiddevaš, ja olbmot leat hui arvasat ja dain lea beroštupmi buktit evttohusaid ja oaiviliid. Nu ahte mun in dieđe vel, ferte oaidnit.

Oskal ii vel dieđe galle jietnaneavttára filbmii dárbbašit. Son árvala, ahte unnimustá goit čieža.

Maiddái sámegielat veršuvdna juovlamánus

Filbma lea oaidnin láhkai juovlamánus.

– Lei jurdda, ahte dat premieara galgá seamma áigge máŋgga gillii. Ja dat lea hui earenoamáš, ahte dat sámi veršuvdna ii boađe maŋŋel go dát eará gielaid veršuvnnat. Go das lea premieara Norggas, Suomas ja Ruoŧas aistton váldogielaide, de lea maiddái dán sámegielat veršuvnnas premieara seamma áigge.

Oskal ávžžuha čálistit sutnje e-poastta, jos háliida oassálastit Riddu Riđđus jietnageahččaleapmái.

– Mu meila lea saraoskala(a)gmail.com, ja dan auditiona mun doalan bearjadaga golmmas gitta guđa, beal čieža rádjái ja lávvordaga iđđesbeaivve. Ahte de lea beare čálistit meila ja mun attán eambbo dieđuid, gos mii deaivvadit.

Marianne Boine jearahalai Sara Margrethe Oskala Buorre iđit Sápmi -sáddagis 10.7.2017.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä