Sápmi |

Sámegielat Mumenleahkái ohcagohtet jietnaneavttáriid – ain lea rabas, man láhkai prográmma dahkkojuvvo golmma sámegillii

Sámediggi ja buvttadanfitnodat leat álggahan sámegielat Mumenleagi plánenbarggu.

Ánne Kirste Aikio
Sámedikki gielladorvočálli Anne Kirste Aikio. Govva: Xia Torikka / Yle

Sámegielat Mumenleahki-animašuvnna plánenbargu lea álgán.

Yle almmuhii gieskat, ahte dat dahká ođđa Mumenleahki-prográmma maiddái davvisáme-, anáraš- ja nuortalašgillii. Prográmma dahkama sámegillii lei evttohan Sámediggi.

Sámediggi lea jo čoahkkimastán áššis buvttadanfitnodat Gutsy Animationsiin. Sámi gielladorvočálli Anne Kirste Aikio muitala, ahte sii leat dál guorahallamin, man láhkai prográmma sáhtášii dahkat golmma sámegillii.

– Mii leat dál soahpan, ahte mun čálán dubbema molssaeavttuid. Leatgo gielat ovttastuvvon prográmmas nu, ahte iešguđege mumenat hállet eará gielaid vai leago vejolašvuohta dahkat visot giellaveršuvnnaid sierra? Dakkárge molssaeaktu leamaš, ahte prográmma tekstejuvvo sámegillii, muhto mu mielas dat ii leat nu ideála dan dihte, go dat lea mánáide ja sii galggašedje gullat dan giela.

– Mu vuolggasadji lea, ahte prográmma livčče sierra buot gielaide, ahte leat áibbas čielga anáraš-, nuortalaš- ja davvisámegielat veršuvnnat, Aikio smiehttada.

Muumipeikko ja niiskuneiti istuvat vaaleanpunaisen pilven päällä yläilmoissa.
Mumenleahki-animašuvdna lea vuvdojuvvon Suoma lassin Británniai, Jáhpanii ja Mátta-Koreai. Govva: Moomin Characters & Gutsy Animations

Sámediggi ohcagoahtá vehážiid mielde jietnaneavttáriid. Dárkkuhus lea gávdnat sin giđa áigge, lohká gielladorvočálli Anne Kirste Aikio.

– Mu bargun lea čuovvovaččat ohcat neavttáriid ja dahkat dubbenfitnodahkii evttohusaid sis. Dat lea oalle garra bargu, go dan ráiddus leat 19 rolla.

– Dubbenfitnodat mearrida, ordnetgo mii jietnaneavttáriid geahččalandilálašvuođaid. Muhto dat várra manná nu, ahte oasi mii evttohit ieža giellaservošis ja oasi gávdnat geahččalandilálašvuođain. Neavttáriid ohcan čađahuvvo sihkkarit dán giđa áigge, Aikio muitala.

Yle mihttomearrin lea almmustahttit sámegielat Mumenleagi Yle Areenas loahppajagi 2019 áigge.

Varrasamosat: Sápmi

Váldoođđasat

Varrasamosat

Muualla Yle.fi:ssä