Sápmi

Sámegielat speallanrieggát geasuhit mánáid ja nuoraid Minecraft-máilbmái – njuolggadusaid ferte čuovvut vai suollemas ulbmil ollašuvvá

minecraft rieggis
Latnja lea dievva movttegis sámegielat Minecraft-spealliid Ohcejogas. Govva: Anneli Lappalainen / Yle

Speallanrieggát leat oassi Deanuleagis sámástit -prošeavttas. Daid ordnejit Gáregasnjárggas ja Ohcejogas.

OHCEJOHKA Luohkkálatnja lea dievva mánáid ja nuoraid, geat eai dán vuoro áicca eará go mii lea dihtor šearpmas – ja vel sámegillii. Máilmmi beakkán dihtorspeallu Minecraft lea dán jagi jorgaluvvon sámegillii ja dat lea čohkken mánáid oktii.

Nuorra spealli Niillas Laiti dovdet Minecraft-máilmmis namain AlitBoazu. Son lea njeallje beaivvi leamašan speallanrieggás ja su mielas lea somá já álki speallat Minecrafta sámegillii.

Ovdáneapmi lea álki, go spealu ii dárbbaš dulkot eaŋgalasgielas. Ohcejohkalaš Mággá Eriksen, LuossaBivdi, illuda, go beassá speallat Minecrafta sámegillii.

– Lea dat álkit ainge áddet dan visot mii das lea.

Son lea láven speallat iPadiin ja dát leage vuosttaš háve go son speallá dihtoriin.

Mággá Eriksen
Mággá Eriksena speallannamma lea LuossaBivdi. Govva: Anneli Lappalainen / Yle

Speallanrieggáin lea suollemas ulbmil

Deanuleagis sámástit -fidnu prošeaktahoavda Kati Eriksen muitala, ahte speallanrieggát leat vuolgán olu buorebut johtui go maid sii oba jáhkke. Ohcejogas leat searvan sullii 15 máná ja Gáregasnjárggas fas badjel logis.

– Dán leat váldán vuostá hui bures. Mishan gal leat leamašan measta olles áigge fárus dat seamma mánát, dat gal bohtet juohke háve. Dat min suollemas ulbmil dán duohkin ii leat dat ieš speallu, muhto sámegiella.

Speallanrieggás gulahallet sámegillii ja čavga njuolggadus lea, ahte latnja lea sámegielat latnja. Njuolggadusaid ferte čuovvut vai suollemas ulbmil ollašuvvá.

– Álggus mii galggaimet oalle čavgasit dan čilget ja gáibidit, ahte dat lea sámegielat latnja. Dan maŋŋá, go dat lea boahtán buohkaide čielggasin, mii eat leat dárbbašan rahčat. Ja go Minecraft speallan lea nu somá, de buohkat háliidit boahtit fárrui, nappo dalle buohkat háliidit čuovvut daid min njuolggadusaid, čilge Eriksen.

Kati Eriksen
Prošeaktahoavda Kati Eriksena mielde speallanriekkis lea oadjebas sadji buohkaide, beroškeahttá das, man olu máhttá sámegiela. Govva: Anneli Lappalainen / Yle

Son muitala, ahte speallanrieggáide oasálastet sihke eatnigielat mánát ja maiddái máŋgga dási giellaoahpahallit. Eriksen illuda, go maiddái dat mánát, geat eai ovdal máhttán nu olu sámegiela, leat dál oahppan ođđa sániid ja áddet sámegiela.

Maiddái eatnigielagat besset čájehit sin giellamáhtu ja veahkehit nuppiid.

– Mánát, geain lea eatnigiella sámegiella, de dat čevllohallet iežaset gielain ja sii besset oahpahit daid, geat eai velá máhte. De dieinnálágiin dat lea buktán buohkaide buori.

Eriksen ávžžuha geavahit spealu maid skuvllas

Eriksen lea iešge njuikestan Minecraft-máilbmái ja geahččalan speallat. Son ávžžuha dan maiddái skuvlla geavahussii.

– Mun ávžžuhivččen oahpaheddjiid oahppodiimmuinge geavahit dan ávkin. Doppe ferte máhttit dan giela, jus háliida ovdánit ja johtilit beassat ovddos guvlui. Dat motivašuvdna hástala oahppat.

Eriksena mielde áidna hástalus speallanrieggás lea dán rádjái leamašan dat, ahte sii nohkkojedje dihtoriin.

– Dat lei dakkár somás hástalus. Juos mis lassánit speallit, de gal mii daid dihtoriid oastit dahje háhkat muhtun láhkai.

Niki Rasmus
Minecraft ovddida mánáid ja nuoraid giellamáhtu. Speallanrieggá jođiheaddji Niki Rasmus muitala, ahte Minecraftas leat olu spesiála sánit sámegillii. Govva: Anneli Lappalainen / Yle

Bálkkašumi oažžu, juos veahkeha nuppiid dahje ovdána gielalaččat

Speallanrieggá jođiheaddji Niki Rasmus muitala, ahte speallama oktavuođas sii maiddái bálkkašit spealliid ovdamearkka dihtii limonádabohttaliin. Bálkkašumi dahje skeaŋkka oažžu, juos veahkeha nuppiid dahje ovdána hui olu gielain.

– Lei okta, gii ii duostan geavahit nu olu dan giela, muhto nuppi háve dat geavahii hui olu, de dat lei ovdamearkka dihtii dakkár, mas bálkkašuvvui.

Minecraft-speallu lea oahpes Rasmusii, muhto sámegielat Minecraft lea maiddái sutnje ođđa vásáhus. Dalle go son speallagođii Minecrafta, son gárttai oahpahallat ja speallat dan eaŋgalasgillii.

– Juos livčče leamašan vejolaš, de livččen álggahan speallat sámegillii, Rasmus dadjá.

Niillas Laiti
Minecraft lei vuosttaš spealla man Niillas Laiti spealai ja dál son speallá dan sámegillii. Speallu muitala sámegillii "LuossaBivdi gáhčai allasis". Govva: Anneli Lappalainen / Yle

Ulbmilin lea rájáid rasttildeaddji Minecraft-speallanriekkis

Prošeaktahoavda Kati Eriksen muitala, ahte sis lea ulbmilin fidnet mánáid ja nuoraid speallat ovttas rájáid rastá.

– Mishan livčče ulbmilin fidnet daid oktii speallat ovttas dan seamma Minecraft-máilmmis sihke doppe rájá nuppi bealde dego Deanu šaldis ja Ohcejogas. Dat spealašedje oktanaga ja vejolaččat vel nu, ahte gullet nuppiideaset.

Koronavirusa dagahan dili geažil ii leat vejolaš buktit mánáid oktii. Eriksen muitala, ahte sii leat goittotge plánen jo mii dáhpáhuvvá, go koronaáigi lea meattá.

– Dalle mii áigut doallat dakkáriid oktasaš laniid, ahte mii buktit daid vel seamma báikái speallat ovttas.

Varrasamosat

Muualla Yle.fi:ssä