Sápmi |

Sámegielat Vulle Vuojažat almmustahtton Sámi álbmotbeaivvi gudnin neahtas

Akuankka.fi-siiddus gávdnojit ráidogovat sihke davvisáme-, anáraš- ja nuortalašgillii.

Aki Hyyppä
Vulle Vuojaš -bláđi váldodoaimmaheaddji Aki Hyyppä. Govva: Sanoma Media FInland

Vulle Vuojaža doaimmahus lea čohkken Sámi álbmotbeaivvi gudnin akuankka.fi-siidui-siidui sámegielat ráidogovaid buot Suomas hállon sámegielaiguin.

Váldodoaimmaheaddji Aki Hyyppä muitala, ahte sii leat ovdalge doaimmahusas plánen ášši, muhto dál orui dasa rivttes áigi.

– Iešalddes mii leat doaimmahusas stuorát joavkkuin muhtumin smiehtadan ášši. Vuosttaš geardde jagis 2015 almmustahttui min digitálalaš bálvalusas ovtta siiddu ráidogovva sámegillii. Jurddašeimme, ahte dál galgá juoidá Sámi álbmotbeaivvi gudnin almmustahttit.

– Okta min doaimmaheddjiin finai universitehtas dievasmahttimin iežas oahpuid ja logai das seammás maiddái sámegiela. Das de movttáskii, ahte eatgo mii galgga oažžut Vulle Vuojažii muhtin láhkai sámeáššiid fárrui. Gávnnaheimme, ahte gal dat dása guovvamánu guđat beaivái soahpá hui bures, muitala Hyyppä.

Lohkanláhkai leat dál oktiibuot guhtta ovttasiidosaš ráiddu. Hyyppä muitala, ahte máidnasiid jorgaleapmi lea leamaš sidjiide oalle rahčamuš.

– Min doaimmahusas ii giige gáfat njuovžilit máhte sámegiela, muhto okta doaimmaheaddji bijai daid čehpet bulljarasaide ja dárkkistii vel jorgaleddjiin, ahte buot lea ortnegis, váldodoaimmaheaddji Aki Hyyppä čilge.

Figuvrrain oahpes namat

Vulle Vuojaža doaimmahusas leat leamaš dárkilat das, ahte ráidogovvafiguvrrain leat seamma namat, mat leat ovdalge geavahuvvon sámegielat Vulle Vuojaš -ráidogovain.

– Moatti figuvrra buohta gárttaimet dahkat oalle olu arkiivabarggu. Vulle Vuojažis berošteaddjit leat dan dáfus suohttasat, ahte sii leat čohkken buot máilmmis almmustuvvan Vulle Vuojaš -bláđiid oktan diehtovuođđun. Doppe gávnnaimet buot sámegielain almmustahtton figuvrraid namaid maiddái. Oaččuimet doppe viehka bures veahki, ahte buot galggašii leat ortnegis.

Sámegielat ráidogovat leat oaidnimis goit moadde vahku.

– Ii mis leat mihkkege hoahpuid váldit daid eret doppe. Aŋkke moadde vahku gávdno min ovdasiiddus dát sámegielat ráidogovaid čoakkáldat, muitala Hyyppä.

Varrasamosat: Sápmi

Váldoođđasat

Varrasamosat

Muualla Yle.fi:ssä