Sápmi |

Sámegielddain buorre ruhtadilli – Eanaš Suoma gielddat bártidit ruhtadoaluin

Suoma gielddain guokte goalmmátoasi báhce dáhpaga beallái jagis 2018.

Laskujen maksua.
Sámegielddain dušše Soađegilis lei diibmá vuolláibáza. Govva: Ismo Pekkarinen / AOP

Sámegielddain Anáris, Ohcejogas ja Eanodagas manná ruđalaččat bures. Jagi 2018 ruhtadoalloloahpaheamis dát gielddat ledje bisson bušeahtas ja beassán maiddái vuoittu beallái. Sámegielddain dušše Soađegilis lei vuolláibáza.

Buoremus boađus lei Anáris, go doppe ruhtadoalloloahpaheamis badjelbáza lei birrasiid 1 653 000 euro. Anára gieldda bohtosii váikkuhii dat, ahte gielda čokkii diibmá vearroboađuid eanet go álgoálggus lei árvaluvvon.

Maiddái Ohcejoga gielddas manná ruđalaččat bures, go gielda beasai diibmá čielgasit vuoittu beallái. Jagi 2018 ruhtadoalloloahpaheamis badjelbáza lei birrasiid 720 000 euro.

Eanodaga gielda maid beasai vuoittu beallái diibmá. Ruhtadoalloloahpaheamis badjelbáza lei 181 000 euro. Eanodaga gieldda vearroboađut loktanedje jagis 2018, muhto stáhta ruhtadanoassi fas njiejai ovddit jagi ektui.

Eanaš gielddat bártidit ruhtadoaluin

Áidna sámegielda mii bázii diibmá dáhpaga beallái lea Soađegilli. Gielddas lei vuolláibáza oktiibuot 1 633 000 euro. Gielda šaddáge dál garrasit seastit vai bastá oažžut ruhtadoalu dássededdui.

Suoma gielddain ii obalohkáige mana ruđalaččat dálá dilis beare bures. Diimmáža loguid mielde guokte goalmmátoasi gielddain báhce dáhpaga beallái. Suoma gieldalihttu leage leamašan fuolas gielddaid ruhtadilis ja lea čuoččuhan, ahte gieldaekonomiija lea njuolgut kriissas.

Gieldalihttu mielde gielddaid heajos ruhtadili sivvan lea dat, go vearroboađut ja stáhtadoarjagat leat unnon ja gielddaid golut fas leat lassánan.

Gielddaid ruhtadiliin leat goit stuorra erohusat. Oaivegávpotguovllus gielddain manná bures ja dat leat máŋggaidlogiid miljovnnaid vuoittu bealde. Lappis dáhpaga beallái báhce diibmá oktiibuot 11 gieldda, go ovddit jagi dušše golmma gielddas lei vuolláibáza. Heajumus ruhtadilli ássiidlogu ektui lea Savukoskis, Roavenjárggas, Ranuas ja Giemas. Maiddái Giemajávrris, Muonás, Pelkosenniemis, Pellos, Simos ja Durdnosis báhce dáhpaga beallái.

Varrasamosat: Sápmi

Váldoođđasat

Varrasamosat

Muualla Yle.fi:ssä