Sápmi |

Sámegielddain juohkigohtet maid máskkaid várehis olbmuide

Suomas ávžžuhit geavahit máskka ovdamearkka dihte almmolaš johtolaga geavahettiin.

Kuvassa on huoltovarmuuskeskuksen Kiinasta liikemies Onni Sarmasteen välityksellä hankkimia kasvosuojaimia .
Dearvvašvuođa- ja buresveadjinlágádus THL attii máskaávžžuhusa vahku dassái. Govva: Kalle Parkkinen / Lehtikuva

Sámeguovllu gielddat leat olles fártta ráhkkaneamen juohkit máskkaid várehis olbmuide. Suomas ávžžuhit geavahit máskka ovdamearkka dihte almmolaš johtolaga dego linnjabiilla geavahettiin, sihke báikkiin, gos lea olu olmmoš iige leat vejolašvuohta doallat dorvogaskka.

Anára gielda álggii juohkit máskkaid duorastaga 20.8. ja Eanodagas ja Ohcejogas juohkigohtet boahtte vahkus. Soađegili gielddas eat leat fáhten gielddahoavdda sadjásačča ságaide.

Eanodagas mearridit bearjadaga vuogi juohkigoahtit máskkaid

Eanodaga gielddas máskkaid juohkima leat válmmaštallan ja bearjadaga barget loahpalaš mearrádusa vuogis, mo dat dahkko, muitala gielddahoavda Jari Rantapelkonen.

Rantapelkonen mielde gielddas leat muhtin veardde máskkat rájuin, muhto sii áigot diŋgot daid lasi.

– Jáhkán, ahte boahtte vahkus juohkigoahtit daid gielddas, dadjá Rantapelkonen.

Ohcejohka dieđiha áššis gieldalaččaide bearjadaga

Ohcejoga gielddahoavda Vuokko Tieva-Niittyvuopio muitala, ahte sii juohkigohtet máskkaid boahtte vahku álggus ja dieđihit gieldalaččaide áššis bearjadaga 21.8.

– Ohcejogas máskkaid juohkigohtet gielddadálu rávvenbálvalusas, ja Gáregasnjárgii ja Njuorggámii máskkaid jođihit daid guovlluin johtti dearvvašvuođabargit, dadjá Tieva-Niittyvuopio.

Álggos juhket háválaš máskkaid ja maŋŋá áigot diŋgot báikkálaš fitnodatdoalliin liidnemáskkaid, maid sáhttá bassat ja geavahit máŋgii.

Anáris juohkigohte duorastaga vuoigŋanmáskkaid várehis olbmuide

Anára gielda lea juohkigoahtán vuoigŋanmáskkaid várehis olbmuide duorastaga 20.8. Avvilis, gielddadálus.

Máskkaid juhket maŋŋebárggaid, gaskavahkuid ja duorastagaid diibmu 12-13. Máskkaid sáhttá viežžat, jus dovdá iežas váreheapmin.

Lassedieđuid dán birra gávnnat Anár gieldda neahttasiidduin.

Varrasamosat: Sápmi

Váldoođđasat

Varrasamosat

Muualla Yle.fi:ssä