Sápmi |

Sámegielddat bivdet olbmuid vástidit gažadeapmái sámegielat bálvalusaid geavaheamis

Vástideapmi gažadeapmái lea dehálaš vai gielddat máhttet čujuhit návccaid rivttes bálvalusaide, muitala giellastrategiijabargi Tuuli Miettunen.

Tuuli Miettunen
Giellastrategiijabargi Tuuli Miettunen muittuha, ahte sámeguovllu gielddain lea sámi giellalága mielde geatnegasvuohta fállat gielddalaččaide bálvalusaid sámegillii. Govva: Anár gielda / Inarin kunta

Sámeguovllu gielddat leat čielggadeamen neahttagažadeami bokte olbmuid vásáhusaid sámegielat balvalusain ja namalassii daid geavaheamis.

Ulbmilin lea oažžut dieđuid das, leatgo sámegielagat duhtavaččat dálá bálvalusaide ja man guvlui daid galggašii ovddidit. Eanodaga, Anára, Soađegili ja Ohcejoga gielddat leat válmmaštallamin oktasaš sámi giellastrategiija, mainna geahččalit nannet sámegielaid sajádaga gielddain.

Erenomážit vástádusaid sávvet sis, geat eai geavat sámegielat bálvalusaid. Danin lea dehalaš diehtit, maid bálvalusaid olbmot geavahit vai daidda dihtet bidjat eambo návccaid. Dálá dilis máŋggain gielddain leat menddo unnán sámegielat bargit.

– Hálidat gullat gielddalaččaid oaiviliid, go siihan daid balvalusaid geavahit. Dálá dilis gielddain eai leat doarvái sámegielat bargit, dadjá giellastrategiijabargi Tuuli Miettunen Anára gielddas.

– Sávan maiddái, ahte gažadeami bohtosat veahkehit gielddaid vuhtiiváldit buorebut sámegielaid ovdamearkan dalle, go bargit bálkkáhuvvojit ja maiddái bargiid giellaskuvlejumi ordnemis, go diehtit, maid surggiid sámegielat bálvalusaid gielddalaččat hálidit geavahit, Miettunen namuha.

Gažadeapmái sáhttá vástidit dákko.

Varrasamosat: Sápmi

Váldoođđasat

Varrasamosat

Muualla Yle.fi:ssä