Sápmi |

Sámegielddat skeŋkot ođđa fárrejeaddjiid – Ohcejohka veahkeha ođđa olbmuid ásaiduvvat astoáigebileahtaiguin

Eanodat hohkahallá ođđa ássiid elrávnnjiin, eará sámegielddat astoáigebileahtaiguin.

Vuokko Tieva-Niittyvuopio
Ohcejoga gielddahoavda Vuokko Tieva-Niittyvuopio jáhkká kulturbileahtaid veahkehit ođđa ássiid ásaiduvvat guvlui. Govva: Kaisa Aikio / Yle

Davvi-Suomas lea álgán Tervetuloa Lappiin -prošeakta, man bokte davi gielddat skeŋkot ođđa fárrejeaddjiid iešguđetlágan áššiiguin. Prošeavtta lea bidjan johtui Ohcejoga gielda.

Prošektii leat searvan measta buot Lappi gielddat. Sámegielddain Eanodat lohpida ođđa ássái elrávnnji 100 euro ovddas. Anára, Soađegili ja Ohcejoga gielddat geigejit fárrejeaddjiide Buresboahtin-pakehta, mii sisttisdoallá nuvttá bileahtaid álšasálii ja vuojadanhállii.

"Ohcejohka lea dorvvolaš biras mánnabearrašiidda"

Ohcejogas báitá beaivváš lieggasit miessemánu gaskamuttos. Deatnu šávvá ilolaččat, go lea beassan jiekŋalohkis.

Sámi luondu lea okta ášši, mii geasuha ođđa ássiid davás. Ohcejoga gielddaráđđehusa ságajođiheaddji Ilmari Tapiola atná skeaŋkkaid, nuvttá valáštallan ja -kulturbileahtaid, buorre lassin ođđa ássiid hohkahallamis, muhto oaidná fárremiidda maiddái stuorát sivaid: Ohcejohka lea dorvvolaš biras mánnabearrašiidda ja gildii leat ceaggáneamen máŋga ođđa skuvlla.

– Ohcejoga gielda lea sátsemin ođđa skuvllaide vuoi leat dearvvas skuvllat mánáide ja oahpaheaddjiide. Mun jáhkán, ahte dat geasuha olu eambo go dakkár logi euro bileahtat gosa nu.

Ilmari Tapiola
Ilmari Tapiola jáhkká Ohcejoga geasuhit dorvvolašvuođas dihte. Govva: Kaisa Aikio / Yle

Maiddái gáregasnjárgalaš droššavuoddji Nilla Lukkari eahpida, geasuhitgo dakkár smávva skeaŋkkat ođđa ássiid Ohcejohkii. Son fálašii ovdal eatnama gildii fárrejeaddjiide.

– Mu mielas galggašii leat mii nu eará, mii geasuhivčče eanet, vaikke tontte fidnešii hálbái, Lukkari smiehtada.

Nilla Lukkari
Nilla Lukkari eahpida smávva skeaŋkkaid fámu hohkahallat ođđa ássiid Ohcejohkii. Govva: Govva: Anneli Lappalainen / Yle

Buresboahttin-pakeahtain lea ulbmilin veahkehit ođđa gieldalačča vuogáiduvvat gildii. Gielddahoavda Vuokko Tieva-Niittyvuopio jáhkká valáštallan- ja kulturbileahtaid leat buorre skeaŋka, go daid bokte olbmot besset oahpásmuvvat servošii.

– Mu mielas fárrejeaddjit ohppet ná geavahit gieldda bálvalusaid ja geavahemiin daid besset oahpásmuvvat guovllu olbmuide. Go dovdagohtet báikegotte olbmuid, duddot dáppe buorebut ja guhkit áigge, ja das lea ávki servošii vuogáiduvvamis.

Ohcejoga gieldda astoáiggi- ja valáštallanbileahtat
Dákkár bileahtaid Ohcejoga gielda geige ođđa ássiide. Govva: Anneli Lappalainen / Yle

Gielddahoavda ii máša leat rámitkeahttá dan, man bures vuođđodearvvasvuođabálvalusat leat juksan Ohcejoga gieldalaččaid. Seammás son goittot lea fuolas das, go ámmátolbmuid lea váttis oažžut gildii. Ođđa bargiide lea ain dárbu.

– Mii dárbbašivččiimet ain suoma- ja sámegielat bargiid sihke čuvgehusdoibmii ja dearvvasvuođabálvalusaide, Tieva-Niittyvuopio muitala.

Geahča lasi dán áššis vuossárgga Yle Ođđasiin Yle TV1:žis diibmu 16:45.

Varrasamosat: Sápmi

Váldoođđasat

Varrasamosat

Muualla Yle.fi:ssä