Sápmi |

Sámegirjjálašvuođa beaivvit čohkkejit girjeberošteaddjiid Eanodahkii golggotmánu loahpas

Sámi girjerájusbargit, girjebuvttadeaddjit ja girjeberošteaddjit galget suokkardallat dan, mo sámegielat girjjálašvuohta sáhtašii álkibut joksat lohkkiidis.

Minna Näkkäläjärvi
Johtti Girjerádju -prošeavtta kulturbuvttadeaddji Minna Näkkäläjärvi muitala, ahte Suoma bealde ii leat guhkes áigái ordnejuvvon sámegirjjálašvuođa seminára. Govva: Anni-Saara Paltto / Yle

Johtti Girjerádju ovttas Eanodaga gielddain ja Roavenjárgga sápmelaš spesiálagirjerádjosiin ordne sámegirjjálašvuođa beivviid 26.-27. golggotmánu Eanodagas Heahtás.

Sámegirjjálašvuođa beivviid oktavuođas lágiduvvo Girjegeaidnu-seminára, man ulbmilin lea suokkardallat mo sámegielat girjjálašvuohta galggašii álkibut joksat lohkkiidis.

Johtti Girjerádju -prošeavtta kulturbuvttadeaddji Minna Näkkäläjärvi muitala, ahte dálá dilis sámegielat girjji geaidnu girjerádjosiidda ja lohkki askái ii leat nu álot nu oktageardán.

– Seminára čohkke sámegirjjálašvuođa berošteaddjiid, girjerádjosiid ja girjealmmustahttiid vehá smiehtadit ovttas, ahte mo mii sáhtašeimmet buoridit sámi girjjálašvuođa dili nu, ahte girjjit jovssaše lohkkiid, dadjá Näkkäläjärvi.

Girjegeaidnu-seminára oktavuođas ordnejuvvojit sihke panelaságastallan ja maiddái bargobájit.

– Mii leat bovden buot riikkain girjerádjobargiid ja maiddái girjealmmustahttiid panelaságastallamii. Panela oasseváldit sáhttet de suokkardallat sámi girjjálašvuođa dili iežas geahččan guovllus ja buktit ovdan maiddái dálá hástalusaid, árvala Näkkäläjärvi.

Vurdet oasálastiid – almmuhanáigi bearjadaga rádjái

Johtti Girjerádju -prošeavtta kulturbuvttadeaddji Minna Näkkäläjärvi muitala, ahte Suoma bealde ii leat guhkes áigái ordnejuvvon sámegirjjálašvuođa seminára ja danne son vuordáge oasálastiid. Lágideaddjit sávaše oaidnit báikki alde girjesuorggi olbmuid lassin maiddái oahpaheaddjiid.

– Sávvamis máŋgasat besset searvat, váikko lea ná čakča ja hohppos áigi. Sávan, ahte seminára lihkostuvvá ja doppe leat olu girjeberošteaddjit ja olbmot ságasteame ja ovddideame sámi girjjálašvuođa dili, dadjá Näkkäläjärvi.

Girjegeaidnu-seminára almmuhanáigi nohká dán vahku bearjadaga 11. golggotmánu. Lassidieđuid sámegirjjálašvuođa beivviin gávnnat dáppe.

Varrasamosat: Sápmi

Váldoođđasat

Varrasamosat

Muualla Yle.fi:ssä