Sápmi |

Sámegirjjálašvuohta dárbbaša kulturdoarjagiid – dán háve ráđđehus šluhttii doarjagiid čuohppamiid

Ráđđehusa plána geahpedit kulturdoarjagiid suorggahii máŋggaid doibmiid, dego girjegoasttideaddji, geasa bealli dietnasis lea gitta girjerájuid oastindoarjagis.

Kaija Anttonen
Girjegoasttideaddji Kaija Anttonenii oastin- ja diŋgondoarjagiid heaittiheapmi livčče lean katastrofa, danin go seammás son livčče manahan beali su dietnasis. Govva: Vesa Toppari / Yle

Girjjálašvuođa dahkkit sáhttet dál goit jagi leat ráfis, go ráđđehus ii čuohpage kulturdoarjagiid. Veikkaus-speallovuoitoruđaid čuohppan livčče heaittihan oalát dakkár doarjagiid, main girjerájut ostet unnán vuvdojuvvon girjjálašvuođa ja kulturbláđiid.

Jus oastin- ja diŋgondoarjja girjerájuide livčče heaittihuvvon, dat livčče diehtán smávva goasttidanlágádusaide váttisvuođaid. Dat dorjot maiddái sámegielat girjjálašvuođa jođiheami. Juos boahttevuođas háliidit ovddidit sámegielat girjjálašvuođa, doarjagiidda boahtá ain leat dárbu.

Anárlaš girjegoasttideaddji Kaija Anttonen jorgala sámegielat girjjiid suomagillii. Doarjaga nohkan livčče čuohcán sutnje sakka, danin go bealli su dietnasis boahtá girjerájuin, mat diŋgot sus girjjiid.

– Juos dat diŋgojumit jávket 50 proseantta, de dalle mun in šat sáhte daid olggosaddit. Mun lean iešalddes justa dál stuorámus lágádus Suomas, mii addá olggos sámegirjjálašvuođa suomagillii.

Anttonen mielas lea dehálaš, ahte girjerájut ožžot doarjaga. Muđui soaitá geavvat nu, ahte girjerájuid girjefálaldat gáržu dušše dakkárin, maid olbmot lohket ja ostet olu. Son oaidná, ahte doarjaga heaitiheapmi livčče lean áitan sámegirjjálašvuhtii.

– Dalle bázášedje dat unnán vuvdojuvvon girjjit eret. Dakkár girjjit leat olu ja dieđusge sámegirjjálašvuohta lea dakkár, mii ii vuovdde nu hirbmat olu. Mis galgá leat girjáivuohta girjjálašvuođa siste ja dan fálaldagas, maid dat girjerájut addet.

Mikko Kallionsivu
Anára girjeráju hoavda Mikko Kallionsivu muitala, ahte oastin- ja diŋgondoarjaga heaitin dárkkuhivčče Anára girjerájus dan, ahte unnitlogu girjjálašvuođa mearri unnu. Govva: Vesa Toppari / Yle

Doarjaga eret sihkkun livččii oidnon girjerájuid hilduin

Anára girjeráju hoavda Mikko Kallionsivu oaivvilda, ahte doarjaga nohkan livčče stuorra dáhpa njealjegielat gieldda girjerájuide.

– Dát oastin- ja diŋgondoarjja lea eallineaktu girjjiide ja bláđiide, main eai leat nu issoras stuorra vuovdinlogut.

Oastin- ja diŋgondoarjagiin leat Anára gieldda girjerájuide skáhppon maiddái Anarâš-bláđi, mii lea áidna anárašgielat bláđđi. Dilli livčče mearkkašan ovdamearkan dan, ahte girjerájut galggašedje guorahallat, sáhttetgo oba oastit bláđi girjerájuide.

Beaivvi ságaid ja Yle Ođđasiid Sámis sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä