Sápmi |

Sámeguovllu aviissain lea ain unnán sámegielat sisdoallu – báikkálaš aviissain sámegiella goit oidnosta, Lapin Kansasge vejolaččat fargga

Okta báikkálaš aviisa jorgalahttá muhtin ođđasiid sámegillii, guokte eará aviissa fas almmustahttet sámegielat dieđáhusaid.

Saamelaisalueen paikallislehdet Enontekiön sanomat, Inarilainen ja Sompio
Eanodaga báikkálaš aviisa Enontekiön Sanomat jorgalahttá muhtun ođđasiid sámegillii, Inarilainen ja Sompio almmustahttet sámegielat dieđáhusaid. Govva: Linnea Rasmus / Yle

Suoma sámeguovllu aviissat eai dán dilis buvttat olus sisdoalu sámegillii.

Eanodaga báikkálaš aviisa Enontekiön Sanomat lea dálá dilis áidna aviisa, mii buvttada ieš sámegielat ođđasiid. Dábálaččat aviissas lea sullii siidolahkki sámegiella, nappo jogo okta stuorát davvisámegielat ođas dahje moadde smávit ođđasa.

Aviissas ii goit leat sámegielat doaimmaheaddji. Váldodoaimmaheaddji Katja Keskitalo muitala, ahte sii válljejit ođđasiid, maid árvalit beroštahttit sámegielat lohkkiid, ja jorgalahttet daid jorgaleaddjis. Seamma ođđasat gávdnojit aviissas maid suomagillii.

– Mii geahččalat válljet dehálamos ságaid, aiddo fal dakkáriid, main livččii miinu ávkkiid sámegielagiidda, muitala Keskitalo.

Enontekiön Sanomat -aviissa váldodoaimmaheaddji Katja Keskitalo árvala, ahte dilli bissu seamma dásis dás duohkoge.

Inarilainen ja Sompio almmustahttet sámegielat dieđáhusaid

Anára ja Ohcejoga guovlluid báikkálaš aviisa Inarilainen ja Soađegili guovllu báikkálaš aviisa Sompio eai buvttat ieža sámegielat sisdoalu.

Dat goittot almmustahttet sámegielat dieđáhusaid, muitala beaivválaš jođiheaddji Jari Haavisto Lapin lehtikustannus -fitnodagas, mii oamasta guktuid aviissaid.

– Dálá dilis mii figgat loktet Sompio-aviisii buot sámegielat áššiid, maid mii oažžut ovdamearkka dihte Meahciráđđehusas dahje Sámedikkis. Neahttaaviissas figgat almmustahttit ollislaččat daid ođđasiid, mat bohtet golmma sámegillii.

– Inarilainen-aviisa almmustahttá ságaid buot golmma sámegillii, Haavisto čilge.

Aviissat eai buvttat sámegielat ođđasiid ieža, daningo doaimmahusain ii leat sámegielat doaimmaheaddji.

Lapin Kansa vuordá stáhtadoarjaga sámegielat ođđasiidda

Lapin Kansa -aviisa ii leat buvttadan sámegielat ođđasiid badjelaš jahkái.

Aviisa buvttadii jagi 2012 rájes sámegielat ođđasiid stáhtadoarjagiin. Davvisámegielat "Ságat" báhce goittot aviissas eret geassit 2018.

Lapin Kansa lei dalle ohcan minoritehta aviissaide dárkkuhuvvon stáhtadoarjaga sámegielat mediafálaldaga buvttadeapmái, muhto ohcamuš maŋŋonii olmmošlaš feailla dihtii.

ságat lapin kansa
Sámegielat ságat eai leat leamašan Lapin Kansa -aviissas ja neahtas geasi 2018 rájes. Govva: Lapin Kansa

Dán čavčča Lapin Kansas gerge ohcamušain áiggil ja dál vurdet mearrádusa stáhtadoarjagis.

– Dál mii leat sádden ođđa ohcamuša. Jos oažžut doarjaga, de sihkkarit álggahit sámegielat ođđasiid buvttadeami dalán, go oažžut dasa bargi, muitala Lapin Kansa vástideaddji váldodoaimmaheaddji Antti Kokkonen.

Suoma bealde ii leat oktage sámegielat aviisa, mii almmustuvašii vahkkosaččat. Suomas lea okta sámegielat aviisa, anárašgielat Anarâš-lostâ, mii almmustuvvá njelljii jagis.

Varrasamosat: Sápmi

Váldoođđasat

Varrasamosat

Muualla Yle.fi:ssä