Sápmi

Sámeguovllu gielddain masá 800 skuvlalačča vázzet skuvlla gaskaboddosaš viesuin – Avvila oahppit leat duđavaččat

Avvila vuođđoskuvlla fásta skuvlaviesus máŋgasiin čalmmit hilaštedje, njunni lei dahppon, ledje čotta- ja jietnaváttut, oaivebákčasat ja eará sullasaš váttut. Danin sii vázzet dál skuvlla gaskaboddosaš viesus.

Avvila skuvlla čihččet luohká oahppi Noora Niemelä.
Avvila skuvlla čihččet luohká oahppi Noora Niemelä lea duđavaš gaskaboddosaš lanjaide. Govva: Ritva Torikka / Yle

Oppa Suomas gaskaboddosaš skuvlaviesuin leat measta 50 000 vuođđoskuvlla oahppi, čielgá Yle otne duorastaga almmustahttin čielggadeamis. Sivvan oahppiid sirdimii eret fásta skuvlalanjain leat sisáibmováttisvuođat.

Sámeguovllus, Ohcejoga, Anára ja Soađegili gielddain, masá 800 vuođđoskuvlla oahppi vázzet skuvlla gaskaboddosaš skuvlaviesuin dán čavčča.

Avvila vuođđoskuvlla čihččet luohká oahppit leat duđavaččat, go ožžot vázzit skuvlla gaskaboddosaš viesus fásta skuvlaviesu šiljus.

Avvila skuvlla oahppit vázzet skuvlla gaskaboddosaš viesus.
Avvila skuvlla oahppit vázzet skuvlla gaskaboddosaš viesus. Govva: Ritva Torikka / Yle

Oahppi Noora Niemelä muitala, ahte sullii bealis sin luohká oahppiin ledje váttut fásta skuvlaviesus. Sutnje doppe bohte váttut viđa minuhtas.

– Mun lean geahččalan leat doppe, muhto mus leat vuoigŋanváttisvuođat. Dáppe gaskaboddosaš viesus leamašan buorre.

Oahpaheaddji Heikki Hirvonen lea bargan skuvlaviesuin logemat jagi. Son ii leat alddás fuobmán váttisvuođaid, muhto oahppiin dat dihttui máŋgga láhkai: čalmmit hilaštedje, njunni lei dahppon, ledje čotta- ja jietnaváttut, oaivebákčasat ja eará sullasaš váttut.

Oktage skuvlaviesuin dahje -lanjain ii leat goittotge geavahangildosis.

– Nu olu oahppiin ledje váttut, ahte lea buorre go sis lea viessu, gos sihkkarit leat dearvvaslaš ja dorvvolaš skuvlavázzinlanjat. Fástaviesus sii sáhttet de muhtin lanjaid geavahit uhcit, dadjá Hirvonen.

Avvila skuvlla oahpaheaddji Heikki Hirvonen.
Avvila skuvlla oahpaheaddji Heikki Hirvonen. Govva: Ritva Torikka / Yle

Vaikke oahpaheaddjit šaddet vehá doapmat diŋggaiguin viesus nubbái, de oahppiide gaskaboddosaš viessu leamašan buorre.

– Ii leat váttis, baicce nuppe gežiid, oaivvilda Niemelä.

Avvilii áigot hukset ođđa skuvlaguovddáža.

Geahča lasi dán áššis duorastaga Yle Ođđasiin diibmu 16:52 Yle TV1-kanálas.

Varrasamosat: Sápmi

Váldoođđasat

Varrasamosat

Muualla Yle.fi:ssä