Sápmi |

Sámeguovllu láigovistedilli lea báikkuid duođaid heittot – Pilvi Ingebrigtsen iská juohke beaivve gávdnat alcces ođđa vistti

Máŋgasat Anáris heibot váttis vistedilis. Láigovisteráiddus leat badjel 170 olbmo vuordimin ruovttu alcceseaset.

yrittäjä Pilvi Ingebritsen Ivalosta
Fitnodatdoalli Pilvi Ingebrigtsen galggašii farggamusat gávdnat ođđa vistti, gosa fárret. Govva: Kirsti Länsman / Yle

Fitnodatdoalli Pilvi Ingebrigtsen dutkkada juohke beaivve neahtas friija láigovisttiid. Dál son ássá Avvilis muhtun dálu lovttas, muhto dálu vuovdima dihte lea fargga báhcimin vistti haga. Čoavddus ássandillái ii oro gávdnomin.

– Lea gal oalle doaivvuhis dovdu, ahte láigovisttit eai oktageardánit leat. Musge lea beana, de illá gávdno visti, gosa sáhttá ealli váldit, muitala Ingebrigtsen.

Jyri Haimakainen ja su eamit fárriiga máddin davás ja sudnos geavai lihkku. Dego lottos livččiiga vuoitán, go gávnnaiga alcceska ássanvistti.

– Gal dat oalle álkket dasto manai. Jearaime dakkár bartta, man dábálaččat láigohit vahkkui hávil, ja oaččuimege dan guhkit áigái, illuda Haimakainen.

Gielddahoavdda mielas dili ferte čoavdit

Máŋgasat Anáris goit heibot váttis vistedilis. Láigovisteráiddus leat badjel 170 olbmo vuordimin ruovttu alcceseaset.

Olbmot leat dahkan Anára gildii váldostivraálgaga, mas dahttot gieldda hukset lasi láigovisttiid. Jođánis čoavddus ii leat, muhto dat sáhttá gávdnot ovttaskas olbmo veahčiris ja burssas.

– Vuosttas čoavddus lea, ahte ovttaskas olbmot huksejit láigovisttiid. Nu leat dahkan sihke Anáris ja Avvilis. Buot visttiide leat gávdnon ássit. Gieldda vuođđobargun ii leat hukset buohkaide visttiid, oaivvilda beaivválaš jođiheaddji Sampo Kirjarinta Anára gieldda láigovistefitnodagas.

Inarin Vuokra-asunnot Oy toimitusjohtaja Sampo Kirjarinta
Beaivválaš jođiheaddji Sampo Kirjarinta ii lohpit, ahte gielda álggášii hukset ođđa láigovisttiid. Govva: Kirsti Länsman / Yle

Anár lea das earenomáš gielda, ahte deike fárrejit olu olbmot ja dál maiddái gáiddusbargit leat gávdnagoahtán Anárii. Ovcci mánus gielda oaččui čuođi ođđa ássi.

– Gal mii dárbbašat lasi ođđa visttiid. Jus bargiide eai leat visttit, das gillájit min ealáhusat. Dán dili lea bággu čoavdit, dadjá fas Anára gielddahoavda Toni K. Laine.

Inarin kunnanjohtaja Toni K. Laine
Gielda geahččala gávdnat čovdosa váttes láigovistedillái, lohpida gielddahoavda Toni K. Laine. Govva: Kirsti Länsman / Yle

Dilli ii leat dađi buoret eará sámeguovlluinge

Eanodaga gielddas muitalit, ahte Gilbbesjávrris lea stuorra váilevuohta láigovisttiin. Maiddái Gárasavvonis buot láigovisttit leat dievva. Heahtás ja Bealdovuomis fas gávdnojit muhtin guoros láigovisttit.

Ohcejogas stuorámus dárbu láigovisttiide lea girkosiiddas. Doppe olbmot jearahit eanaš unnit visttiid, muitalit gielddas. Njuorggán guovllus eai leat dál jearahan láigovisttiid, ja Gáregasnjárggas fas gávdnojit joba guoros visttit ođđa láigolaččaid várás.

Yle Ođđasiid Sámis ja Beaivvi ságaid sáhtát maid guldalit Yle Areenas.

Varrasamosat: Sápmi

Váldoođđasat

Varrasamosat

Muualla Yle.fi:ssä