Sápmi |

Sámeguovllu nuorain leat unnán deaivvadanbáikkit – Movttiidedje johtti nuoraidlanjas

Johtti nuoraidbarggu Walkers-biila johtá dán čavčča Sámis. Dán vahkus biilii besse oahpásmuvvat Gáregasnjárgga nuorat.

Video: Walkers-biila
Video
Filmma lea doaimmahan Kirsti Länsman ja govven/čuohppan Anneli Lappalainen.

Walkers-nuoraiddoaimma Leijona-biila johtá dán čavčča Sámis veahkkin ordnemin nuoraidbarggu doppe, gos nuorat leat.

Biila lea vuodján dán vahkus Ohcejoga guovllus. Gáregasnjárgalaš Biret-Iŋgá Pieski oahpásmuvai johtti nuoraidlatnjii gaskavahku, go biila bisánii Gáregasnjárgga gillái.

Johtti nuoraidbarggu Walkers-biillas nuorat sáhttet gáfestallat ja ságastallat dahje dušše beare leat ovttas. Biret Iŋggá ruoktu lea moaddelot kilomehtera duohken Gáregasnjárggas. Son lea váillahan deaivvadanbáikki.

– Mis eai leat dáppe nu hirbmat ollu sajit, gos dušše beare leat. Dat lea álo olgun. Doppe soaitá boahtit galmmas, go dálvige boahtá. 

– Jurdda nuoraidsajis, mii lihkada, lea miellagiddevaš, lohká Pieski.

Biret Iŋgá Pieski
Gáregasnjárgalaš Biret-Iŋgá Pieski lea váillahan nuoraide deaivvadanbáikki. Govva: Kirsti Länsman / Yle

Walkers-biila lea vuollel 18-jahkásaš nuoraid deaivvadanbáiki. Ulbmilin lea buktit oktii dorvvolaš rávesolbmo ja nuoraid. Fárus leat nuoraidbargi lassin eaktodáhtolaččat.

– Dáppe leat goit guhkes mátkkit, de dáthan lea buorre vuohki go nuoraidsadji johtá sajis nubbái. Lea álkit maiddái nuoraide boahtit dasto dása, muitala Ohcejoga nuoraidbargi ja Walkers-biilla vuoddji Aleksi Ahlakorpi.

Nuoraidbargi ja Walkers-biillavuoddji Aleksi Ahlakorpi
Nuoraidbargi Aleksi Ahlakorpi maiddái gáfestallá nuoraiguin. Govva: Anneli Lappalainen / Yle

Sámeguovllus johtá Walkers-biilla fárus maiddái sámegielat bargi.

– Sámegiella lea váldon vuhtii diená, ahte mis lea álot okta olmmoš dáppe biillas, gii máhttá sámegiela. Ohcejohka lea guovttegielat gielda. Dieđusge galgá máhttit goabbáge giela dán barggus ja maiddái nuorat leat guovttegielat nuorat, čilge Ahlakorpi.

Walkers-biila
Ohcejoga nuoraidbargi Aleksi Ahlakorpi hálešta Ánte Tenorantain ja Asser Sarrein. Soai leaba boahtán oahpásmuvvat Walkers biilii. Govva: Anneli Lappalainen / Yle

Dán vahkuloahpas nuorat sáhttet sihke gáfestallat ja gárddástallat, go Walkers-biila lea bearjadagas sotnabeaivái Ohcejogas Skállovári bigálusáiddi luhtte.

– Dát ovttastahttá min nuoraid dáppe. Dat lea mu mielas dat dehálamos ášši. Ja ahte lea dakkár sadji, gosa buohkat leat bures boahttin, rábmo Biret-Iŋgá Pieski.

Varrasamosat: Sápmi

Váldoođđasat

Varrasamosat