Sápmi

Sámekultuvra ovdan Pariissas – Duodji, dáidda ja maid Yle Sámi artihkkal

Pariissa Suoma-instituhtas lea rahpasan álbmogii čájáhus, mii ovdanbuktá sámekultuvrra ja duoji.

Sara Wesslin
Yle Sámi nuortalašdoaimmaheaddji Sara Wesslin sámečájáhusas Pariisas. Wesslina duohken oidno Outi Pieski dáiddaduodji. Govva: Henry Lämsä

Pariissalaččain lea dán čavčča liiba oahpásmuvvat sámekultuvrii. Pariissa Suoma-instituhtas lea rahpasan álbmogii čájáhus, mii ovdanbuktá sámekultuvrra ja duoji. Mielde leat 14 sámeduojára ja -dáiddara duojit.

Fáhcat, geres, dáidda ja filmmat. Earret eará daid bokte lea vejolaš oahpásmuvvat sámekultuvrii Pariissas Fránkriikkas. Suoma Fránkriika Instituhta čavčča programmas ovdanbuktet viidát sámi duoji ja kultuvrra.

pariisa, sámeduodji čájáhus
Sámeduojit čájáhusas Pariisas. Govva: Sara Wesslin / Yle

– Guorahalaimet Suoma Fránkriihka instituhtas, ahte mat leat dehalaš áigeguovdiliš temat ja jienat maid háliidit ovdanbuktit fránskalaččaide. Dál Sámis gávdnojit beroštahtti dahkkit, dáiddarat ja temat, muitala Suoma Fránkriika instituhta jođiheaddji Johanna Råman.

Duddjot-nammasaš čájáhus rahppojuvvui duorastaga.

Geahčči illuda fiinna čájáhusas

– Čájáhus lea hui bures dahkkon, danin go doppe leat seaguhuvvon iešguđetlágan sámebiktasat, giehtaduojit ja govat, gos lea ovdamearkka dihtii nissonolmmoš gávttis, lohká pariisalaš čájáhusguossi Olivier Bachelet.

Olivier Bachelet
Olivier Bachelet lei boahtán sámečájáhusa rahpamii Pariisii ja illudii fálaldagas. Govva: Sara Wesslin / Yle

Pariissa olbmot sáhttet dál moadde mánu oahpásmuvvat sámekultuvrii. Dán čavčča áigge maiddái sámi filmmat čájehuvvojit ja oaidninláhkái leat earret eará Marja Helander oanehisfilbma Eatnanvuloš lottit ja Katja Gauriloff dokumeanta Mánu meahci Kaisa. Duddjot-čájáhus lea rabas juovlamánu 20. beaivvi rádjái.

Sihke galledeaddji ja ordnejeaddji jáhkkiba kultuvrra beroštahttit pariisalaččaid.

– Jáhkán pariisalaččaid liikot biktasiin, skuovain, sistediŋggain ja šerrešdiŋggain. Jáhkán maid, ahte eai leat instituhtat, main gieđahallo dákkár kultuvrra ja árvalan olbmot bohtet liikot fálaldahkii, Olivier Bachelet smiehtasta.

Johanna Råman
Suoma Frankriika instituhta jođiheaddji Johanna Råman mojohallá Duddjot-čájáhusa rahpandoaluin Pariisas. Govva: Sara Wesslin / Yle Sápmi

Johanna Råman fas muitala, ahte go sii ledje gárvemin čájáhusa, nu máŋgasat bisánedje geahččat lássaráigge. Son jáhkká ollisvuohta boahtá beroštahttit báikkálaččaid.

Yle Sámi doaimmaheaddji artihkkal mielde čájáhusas

Yle Sámi doaimmaheaddji Sara Wesslin diibmá almmustuvvan artihkkal “Ylpeys ylläni” lea oaidninláhkái Pariisas čájáhusa oktavuođas. Artihkkal lea jorgaluvvon eaŋgalas- ja fránskkagillii čájáhusa várás.

Wesslin lea báikki alde Pariisas čuovvomin čájáhusrahpama ovttas govvejeaddji Henry Lämsäin, guhte lea govven Wesslina artihkkala govaid. Wesslin lohká leat hui rámiin, go su artihkkal lea jorgaluvvon ja de váldojuvvon mielde čájáhussii.

– Lei somá beassat deike ja buktit dearvvuođaid Sámis deike Pariisii, son dadjá.

Sara Wesslin Sámečájáhus Pariissas

Varrasamosat: Sápmi

Váldoođđasat

Varrasamosat

Muualla Yle.fi:ssä