Sápmi |

Sámekultuvrras inspirašuvnna ožžon Klaus-animašuvdna lea evttohassan Oscar-bálkkašumi vuoitin

Filmma dahkkit leat ovttasbargan sámi filbmadahkkiiguin, go leat viežžan inspirašuvnna sámekultuvrras.

Klaus-filmmas leat sápmelaš karakterat
Klaus-filmmas leat sápmelaš karakterat, geat hállet sámegiela. Smávva nieiddaža, Margu, jietnaneavttárin lea Neda Labba. Govva: Netflix

Netflix animašuvdnafilbma Klaus lea evttohassan Oscar-bálkkašumi vuoitin buoremus animašuvdnafilmma kategoriijas. Filmmas leat sápmelaš karakterat, geat maiddái hállet sámegiela originála eaŋgalsgielat filmmas.

Filmma dahkkit leat ovttasbargan sámi filbmadahkkiguoktáin Oskar Östergren Njajtain ja Sara Margrethe Oskaliin, go leat viežžan inspirašuvnna sámekultuvrras. 13-jahkásaš Neda Labba neaktá buot giellaveršuvnnain davvisámegielat Margu-nieiddaža, muitala Sameradion & SVT Sápmi.

Klaus lea filbma, mii muitala juovlastálu šaddamis. Máidnasis nuorra boastabargi sáddejuvvo bargat gilážii poláragierddu davábeallái. Doppe son oahpásmuvvá duojáriin, guhte ráhkada duhkorasaid. Filmma lea bagadallan Sergio Pablos.

Dá lea Klaus-animašuvnna filbmaseakti. Video: Netflix

Eará evttohasat buoremus animašuvdnafilmma Oscarii leat How to train your dragon: the hidden world, I lost my body, Missin link ja Toy story 4.

Oscar-bálkkašumit juhkkojuvvojit sotnabeaivve 9.2.2020. USA filbmaakademiija (Academy of Motion Picture Arts and Sciences) juohká jahkásaččat Oscar-bálkkašumiid buoremus filmmaide ja daid dahkkiide iešguđet kategoriijain.

Varrasamosat: Sápmi

Váldoođđasat

Varrasamosat

Muualla Yle.fi:ssä