Sápmi |

SámeLAN čohkkii nuoraid Ohcejohnjálbmái – Dihtora bokte davvinuorat besset stuorra máilbmái

Speallodáhpáhus álggii bearjadaga diibmu 17. Ulbmilin lei nákcet seamma čalmmiiguin addit lávvardaga gaskabeaivvi rádjái.

Video: Leevi Halonen Ohcejohka
16-jahkásaš ohcejohkalaš Leevi Halonen lea dan oaivilis, ahte dihtora bokte sii boaittobealguovllu nuoratge sáhttet juksat stuorra máilbmi. Filmma lea doaimmahan Kaisa Aikio ja govven/čuohppan Kirsti Länsman. Video: Yle Areena
ohcejohka

Ohcejoga márkanis lea issoras guhkes mátki juohke guvlui. Skuvlaahkásaččat eai ovtta vahkuloahpa áigge olle beare guhkás. Dihtora bokte stuorra máilmmi goit lea vejolaš juksat. Nu speallomáilmmi go virtuálamáilbmi bokte lea vejolaš hurgit vaikke gos, dušše miellagovahus lea rádján.

Ohcejoga Áilegas-dálus ordnejuvvui mannan vahkuloahpas báikegotti vuosttas dihtorspeallama SámeLAN-dáhpáhus. Dáhpáhusa ordnii Ohcejoga nuoraid váldostivra. Speallodáhpáhus álggii bearjadaga diibmu 17. Ulbmilin lei nákcet seamma čalmmiiguin addit lávvardaga gaskabeaivvi rádjái. Oktiige nuorat ožžo lobiin gohcit nu guhká go nákcejedje. Sávrrimusat spelle gitta lávvardaga iđitija rádjai.

Okta dáhpáhusa lágideaddjin, 16-jahkásaš logahatoahppi Leevi Halonen mielas lea dehálaš, ahte báikegotti nuorat dánlahkai besset čoahkkanit ja ovttas speallat.

Dihtormáilmmis buot lea vejolaš. Sii eai leat čadnojuvvon iežaset uhca ruovttumárkanii, muhto besset viidásabbot.

– Mii beassat áibbas nuppelágan máilmmiin dahkat áššiid, maid muđui eat sáhte. Spealut leat vaikke makkárat, sáhtát vaikke gomuvuođas girdit ja mearabodnái hukset čázevulošgávpoga. Dušše miellagovahus lea rádján, muitala ohcejohkalaš nuorra Leevi Halonen.

Ohcejohkalaš nuorat ovttas speallamin.
Same LAN nuoraid speallodáhpáhus čohkkii báikegotte nuoraid ovttas speallat Ohcejohnjálmmis. Sevndjes lanjas dušše beallobeavddit lávlot go nuorat spellet dihtorspealuid. Govva: Kaisa Aikio / Yle

Bunci ravggai easka iđitija

Ohcejohkalaš badjedási oahppi, 15-jahkásaš Jesse Ruokolainen gillii seamma čalmmiiguin attihit iđitija rádjai. Dan maŋŋá leai bággu váhá snahpastit.

Su mielas goit leai somá, go báikegotte nuorat besse dánlahkai čoahkkanit.

– Dat leai áibbas somá, go beasai skihpáriiguin váhá speallat guhkibut go dábálaččat, muitala Jesse Ruokolainen.

Gal son lohká eatni lohpidit ruovttusge speallat, muhto ovttas speallan lea olu somát go okto.

– Eadni lohpida, muhto dat ii leat nu somá go beassá skihpáriiguin seamma sajis speallat, dat lea olu somát ná, dadjá Jesse Ruokolainen.

Jesse Ruokolainen Ohcejohka
15-jahkásaš Jesse Ruokolainen gillii speallat iđitija rádjai. Su mielas lea somá, go báikegotte nuorat dánlahkai čoahkkanit oktii. Govva: Kaisa Aikio / Yle
Speallodáhpáhussii oassálastán stuorát nuorat muitalit, ahte speallan ii leat dušše áigeájánin sidjiide. Speallama bokte nuorat ohppet diehtoteknihka dáidduid ja eaŋgasgiela, main soaitá leat maŋŋelabbos ávki ovdamearkan bargoeallimis.

Gánddaid lohket maid njoahcin čállit, muhto lávvardaga dat čielggai, mo sin suorpmat dušše lávlot boallobeavddi alde. Dasge lea maŋŋá ávki.

Iige speallamis leat ahkerádjá, dat heive buohkaide. Gal dan oahppá, go beare gille čohkkát.

– Dat lea álggos váttis, muhto dan gal oahppá dasto dan go váhá eanet speallá. Boarrásutge oahppá, go beare doarvái speallá, dadjá ohcejohkalaš nuorra Jesse Ruokolainen.

Varrasamosat: Sápmi

Váldoođđasat

Varrasamosat

Muualla Yle.fi:ssä