Sápmi |

Sámemusea Siida oažžu lasi bargiid – boahttevuođas vurdet maid ain eanet galledeaddjiid

Oahpahus- ja kulturministeriija lea ođadan museaid guoski juogu ja dan dihte davvin vihtta musea ožžot lasi bargiid.

Sámemusea Siida
Sámemusea ja Davvi-Lappi luondduguovddáš Siida Anáris lea dat báiki, mii olles Anára gielddas geasuha jagis nubbái eanemus gallejeaddjiid. Govva: Vesa Toppari / Yle

Sámemusea Siida oažžu lasi bargoveaga, go dat lea nammaduvvon oktan Davvi-Suoma vástomusean. Siida oažžu 2,5 virggi lasi dán nammadeami dihte.

Vástomusea bargun leat museadoaimma ovddideapmi iežas doaibmaguovllus, kulturbirrasa áššedovdibarggut, ja kulturárbbi, dáidaga ja visuálalaš kultuvrra ovddidan- ja áššedovdibarggut.

Bargguide gullet maid luondduárbbi guoski dieđu čoaggin ja rádjan, ja dasa gullevaš ovttasbargu.

Ođđa ortnega mielde maid Lappi eanangottemusea ja dáiddamusea, Duortnosleagi musea ja Giema dáiddamusea ožžot lasi virggiid. Oahpahus- ja kulturministeriija mearrádusa mielde ođđa doaibmamálle álgá boahtte jagi álggus.

Siida dagai golggotmánus olahusa

Sámemusea Siida dagai golggotmánus ođđa galledeaddjiolahusa. Mannan mánus musea čájáhusain fitne váili 2 691 olbmo, go mannan jagi golggotmánu lohku lei 2 256 olbmo.

Siida Anáris lea doaibman badjelaš 20 jagi ja mihttárat čájehit, ahte galledeaddjiid mearri dušše lassána.

Museagalledeaddjiid mearri molsašuddá goit jagiáiggiid mielde. Birrajagi statistihkat čájehit, ahte cuoŋo- ja miessemánut leat dakkárat, goas ii leat nu stuorra olmmošjohtu Anáris. Dábálaččat galledeaddjit leat muđuige čielgasit eanet geassemánus gitta borgemánnui go dálvemánotbajiid áigge.

Dálvemánotbajit leat goittotge geasuhišgoahtán. Ovdamearkka dihte golggotmánnu leamaš Siiddas ovdal jaskkes áigi, muhto guovssahasturisttaid ánssus golggotmánus leat dán áigge Anára márkanis valjis olbmot jođus.

Stuorámus oassi Siidda čájáhusaid galledeaddjiin leat olgoriikkalaš joavkkut ja ovttaskas olgoriikkalaš olbmot. Sierra álbmogiid gaskasaš veardádallamis eanemus guossit golggotmánus ledje USA:s. Sin lassin nuortaásialaččat johtet valjis, dan lassin duiskkalaččat, frankriikalaččat ja stuorrabritánnialaččat leat árbevirolaš museaguossit.

Museas vurdet gealdagasas, šaddágo ođđa jahkeolahus

Davvi-Lappi luondduguovddáš ja sámemusea Siida lea Anár gieldda bivnnuhis galledanbáiki. Jagis 2018 Siidda gallededje badjel 117 000 olbmo. Galledeaddjiid mearrái rehkenastojuvvojit buot Siiddas fitnan olbmot: olbmot geat fitne čájáhusain ja dáhpáhusain, Meahciráđđehusa rávvenbáikkis, Anára gieldda turismarávvenbáikkis, Siida Shop -gávppis ja Sarrit-restoráŋŋas.

Diibmá Siiddas ledje veháš badjelaš 59 000 čájáhusguossi, mii lea Siidda historjjá nubbin stuorámus galledeaddjimearri. Ovddit jahki lei Siidda historjjá buoremus jahki, dalle čájáhusguossit ledje 63 000.

Dán jagi sámusea čájáhusain leat fitnan 2 000 olbmo eanet go diibmá. Jagis 2018 Siiddas ledje 10 5480 galledeaddji. Dál leat čoahkis juo 10 7512 ja loahppajahki de čájeha, šaddetgo ođđa olahusat. Dieđu vurdet gelddolaš dovdduiguin.

– Mii vuordit gealdagasas, cuvketgo dán jagi vuosttas háve Siidda historjjás 63 000 čájáhusguossi rájá, muitala musea vuovdimis ja márkanfievrrideamis vástideaddji Minna Väisänen.

Varrasamosat: Sápmi

Váldoođđasat

Varrasamosat

Muualla Yle.fi:ssä