Sápmi |

Sámemusea Siidda ođđa pop-up-čájáhus čalmmustahttá duodječeahppi Karen Jomppanen dujiid

Pop-up-čájáhusain ávvudit dan, ahte Karen Jomppanen stuorra duodječoakkáldat skeŋkejuvvui Siidii.

Karen Jomppanen duojit
Sámemusea Siidii skeŋkejuvvon čoakkáldagas gávdnojit olu Karen Jomppanen duddjon duojit. Govva: Kaisa Aikio / Yle

Karen Jomppanen (1923–1996) lei hutkás duojár, guhte geahččalattai máŋggalágan áššiid duddjodettiin. Duorastaga 15.10.2020 su dujiin rahppojuvvui Karen Jomppanen – hutkái ja iskkadeaddji duojár -čájáhus Sámemusea ja Davvi-Lappi luondduguovddáš Siidii.

Pop-up-čájáhusas čalmmustahttojuvvo oasáš su duodječoakkáldagas, man su árbbolaččat skeŋkejedje Siidda čoakkáldahkii dán čavčča.

Jomppanen riegádii Anárjot siste, muhto ásai rávesolmmožin Leammi guovllus. Duddjon lei su váimmu lahka ja son duddjui olles eallinagis.

– Son lei čeahpes duojár ja son maiddái oahpahii duodjekurssain dáppe Anára guovllus ja eará sajiin. Sus lea hui viiddes duodječoakkáldat, mii dál skeŋkejuvvui deike, muitala sámemusea Siidda amanuensa Anni Guttorm.

Unna oasáš čoakkáldagas lea dál oaidnin láhkai

Čoakkáldahkii gullet oktiibuot badjel 200 duoji. Duodječoakkáldagas gávdnojit ovdamearkka dihte gávttit, lávkkat, seahkat ja nuvttohat.

Karen Jomppanen lei ovtta láhkai iežas áiggi ovdavázzi duddjoma ektui. Dábálaččat sisteseahkas geavahedje láđđi, muhto Jomppanen hutkkai geavahit láđđi sajis eará materiála.

– Son iskkadii buotlágan materiálaid ja maiddái ođđalágan málliid dahje minstariid dujiide. Son lei čeahppi dien láhkai, ahte son máhtii ovttastahttit iešguđetlágan materiálaid, ivnniid ja málliid, muitala Guttorm.

Karen Jomppanen vierccabálloseahkka
Čoakkáldagas lea maiddái seahkka, mii lea duddjojuvvon viercca bállonáhkis. Govva: Kaisa Aikio / Yle

Duodječoakkáldagas gávdno ovdamearkka dihtii seahkka, man materiálan lea viercca bállu.

– Son iskkadii dakkár earálágan vugiid, ahte ovdamearkan dás lea geavahuvvon rukses sisti dán sisteseahkas, čilge Guttorm.

"Buorre vuohki čalmmustahttit Jomppanen dujiid báikkálaččaide"

Anni Guttorm mielas dát čájáhus lea buorre vuohki čalmmustahttit Jomppanen dujiid báikkálaš olbmuide dáinna čájáhusain.

– Mii jurddašeimmet, go dál oaččuimet dán čoakkáldaga skeŋkejupmin, ahte mii háliidit dan ávvudit unna pop-up-čájáhusain, čilge Guttorm.

Son árvala, ahte vejolaččat boahttevuođas duodječoakkáldahkii sáhttá oahpásmuvvat viiddit čájáhusa hámis. Dán pop-up-čájáhusas lea oaidnin láhkai sullii logi proseantta olles čoakkáldagas.

Anni Guttorm
Sámemusea Siidda amanuensa Anni Guttorm čájeha muhtun Karen Jomppanen dujiid, mat leat skeŋkejuvvon Siidii. Govva: Kaisa Aikio / Yle

Karen Jomppanen ollii duddjoma olis almmustahttit 1982-logus Lapin käsitöitä : Sami kiehtatuojik nammasaš girjji, mii ii šat gávdno vuovdimassii gávppiin. Ferte leat lihkku vai girjji gávdná vel gos nu.

– Dathan lea velge dakkár girji, man mii geahččat go mii háliidit diehtit dujiin dahje dárkkistit man nu ášši, muitala Guttorm.

Čájáhus lea rabas 30.4.2021 rádjai.

Guldal dás sámemusea Siidda amanuenssa Anni Guttorm jearahallama Karen Jomppanen pop-up-čájáhusas ja skeŋkejuvvon duodječoakkáldagas. Jietna: Kaisa Aikio / Yle

Varrasamosat: Sápmi

Váldoođđasat

Varrasamosat

Muualla Yle.fi:ssä