Sápmi |

Sámemusea Siiddas historjjálaš čájáhus anáraš giehtadujiin

Čájáhus rahpasa bearjadaga 14.6.

Toovláš já tááláš anarâš kietâtyeji
Govva Toovláš já tááláš anarâš kietâtyeji -čájáhusa rahpandoaluin. Govva: Anja Kaarret / Yle Sápmi

Toovláš já tááláš anarâš kietâtyeji, nappo dološ ja dáláš anáraš giehtaduodji lea Sámemusea Siidda ođđa čájáhus, mii rahpasa bearjadaga 14.6. Dát čájáhus čiekŋu namalassii dušše anáraš giehtaduodjeárbevierru. Čájáhus ovdanbuktá máŋggabealagit sihke boares ja ođđa anáraš giehtadujiid ja giehtaduoji vugiid.

Muhtumat leat jo beassán oahpásmuvvat daidda dološ ja dáláš anáraš dujiide, go čájáhusas ledje rahpandoalut gaskavahku 12.6. Sámemusea Siidda geassebargi Sáárákáisá Seurujärvi muitala, ahte dát lea historjjálaš čájáhus, go goassege ovdal ii leat leamaš dákkár anáraš čájáhus Sámemusea Siiddas.

– Duojit leat ráhkaduvvon dán čájáhusa várás, boares duojit leat jerrojuvvon olbmuin ja dat leat gávdnon maiddái boares arkiivvain, muitala Seurujärvi čájáhusa dujiid birra.

Sámemusea Siidda geassebargi Sáárákáisá Seurujärvi
Sámemusea Siidda geassebargi Sáárákáisá Seurujärvi Govva: Anja Kaarret / Yle

Ella Sarre lea okta sis, gean giehtaduojit čájáhusas leat oaidninláhkái. Son leige báikki alde rahpandoaluin.

– Munhan lean ráhkadan ovtta čoakkáldaga, ja dáppe leat olu dat dávvirat, muitala Sarre.

Sarre lea ráhkadan maiddái girjji, masa lea čohkken anáraš gávttiid ja rávvagiid daid duddjomii.

– Háliidin dan dihte ráhkadit dan girjji, ahte muhtin oassi ja muhtin áigi goittotge seailu dain.

– Mo dál ođđa sohkabuolva ráhkada daid, de dat lea iežas árbi. Dalle čuođi jagi geahčen sáhttá geahččat, mo dálá áiggi nuorat leat ráhkadan gálvvuideaset.

Toovláš já tááláš anarâš kietâtyeji -čájáhus lea oaidninláhkái 19.4.2020 rádjái.

Varrasamosat: Sápmi

Váldoođđasat

Varrasamosat

Muualla Yle.fi:ssä